Skip to main content

Danielsen: Kujammut aaqqiissutissap mittarfiit ukiorpassuarnik kinguaattoortissavai

Nuup kujataani qeqertat ilaanni mittarfiliunnginnermi ukiorpassuarni anori uuttortaavigineqaqqaartariaqassaaq. Tamatumalu mittarfiit pingasut tamarmik kinguaattoortissavai, attaveqaqatigiinnermut naalakkersuisoq oqarpoq.

Nuummi mittarfiup kujammut aaqqiissuteqarfiginissaata mittarfiliortiternissaq tamaat kinguaattoortissavaa, attaveqaqatigiinnermut naalakkersuisoq Karl Frederik Danielsen (S) taama oqarpoq.

Nuummi innuttaasut arlallit mittarfiup nutaap maanna inissisimaffissaanut taarsiullugu Angisunnguami sanaatoqqullugu akerliussutsimik takutitsiniarput. Qeqertami anorip misissorluarneqarsimannginnera tassani ajornartorsiutaaginnarpoq.

Angisunnguami silamik uuttuinerit kingulliit 2007-imiit 2009-mut ingerlanneqarsimapput, taakkulu silamut paasissutissanut nutartikkanut, 1979-imili ullumikkumut inissisimaffiusumi katersorneqarsimasumut naleqqiullutik allaanerupput, Karl Frederik Danielsen (S) tusagassiuutinut nalunaarummi taama oqarpoq.

- Kujammut aaqqiissutissaq siunnerfigineqassappat, siullermik ukiut arlallit anorimik misissuinitsinnut atortariaqassavagut.

Mittarfiliornissat tamaasa ulorianartorsiortikkai

Suliniut kinguarsarneqaannarani aamma akisunerujussuanngussasoq, naalakkersuisup tikkuarpaa.

- Siusinnerusukkut oqaatigineqareersutut kujammut aaqqiissutissanut assigiinngitsunut misissueqqaarnernik arlalissuarnik suliaqartoqareersimavoq. Mittarfimmut aaqqiissutissami tassani sanaartornermut aningaasartuutit qaffasinnerat peqqutigalugu Ilulissani Qaqortumilu mittarfiliortoqarsinnaajunnaassaaq, inuiaqatigiit aningaasaqarnerannik naliliinerit inerneri ajornerungaatsialertussaammata.

- Naalagaaffiup aningaasalersuinissaanut isumaqatigiissutinut tunngaviusoq piissaaq, aammalu aningaasaqarnerinnaq peqqutigalugu Ilulissani Qaqortumilu mittarfiliornissat piffissaligaanngitsumik kinguartinneqassapput.

LÆS OGSÅ: Mittarfissuassap inissinneqarnera pillugu akerliussutsimik takutitsisoqalersoq

Taamaattumik mittarfiliortiternissamut pilersaarut Inatsisartuni ukiaq aalajangiunneqartup allanngortinnissaanut tunngavissaqanngitsoq, taanna isumaqarpoq.

- Aningaasalersuinermi atugassat inissereerput. Pilersaarusiat inissereerput maannalu sanaartugassanut entreprenørit neqeroorutissaat utaqqiinnarpagut. Inuussutissarsiutinik ingerlatallit namminersortut suliassat suliffissallu nutaat qulakkeerniarlugit aningaasalersuillutik aallartilluareerput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

Seneste Ugeavis

SENESTE NUUK - NYHEDER