Damien Degeorges: EU pillugu oqallittoqaqqittoqartariaqalerpoq

EU-mi niueqateqartarnissaq pillugu oqallittarnissaq pingaaruteqariartuinnavippoq. Nunammi avannarliit killeqanngitsumik niueqatigiissinnaapput, tamannalu Kalaallit Nunaata aningaasaqarneranut iluaqutaasinnaavoq. Kalaallit Nunaat sooruna niueqatigiinnermut peqataanissani tunuarsimaarfigissavaa, naak nunani avannarlermiut pingajorarterutaat niueqatigiinnermut peqataagaluartut?

Ph.d.-iullunilu siunnersortaasoq Damien Degeorges taamatut apeqquteqarpoq. Kalaallit Nunaata Issittumi inissisimanera ilisimatuutut allaatigeqqammerpaa. Aamma suliffeqarfimmik Reykjavikkimik aallartitsisuuvoq ukioq kingulleq, suliffeqarfik Degeorges Consulting ehf.-imik taaguuteqarpoq.

Suleqatigiinnermi ineriartorfiusinnaasut
Killeqanngitsumik niueqatigiinnermi Savalimmiut ilaavoq Islandimik Høyvik-imik isumaqatigiissuteqarnikkut. Killeqanngitsumik niueqatigiinnermi periarfissat taamaasillutik misissorneqarput.

Islandi EU-mi ilaasortaanngikkaluarluni European Free Trade Associationimut (Efta-mut) ilaasortaavoq. Islandi EU-mi ilaasortaanngikkaluarluni nunani siullersaalluni killeqanngitsumik niueqateqarsinnaanermut ilaasortanngoqqaartuuvoq. Efta-mut ilaasortaaniaraanni nuna namminersortuusariaqarpoq.

Savalimmiut tassunga ilaasortaalissaguni Danmarki aqqutigalugu EU-mut ilaasortanngorniarsinnaavoq. Kalaallit Nunaat assinganik aamma periarfissaqarpoq.

- Killeqanngitsumik niueqateqarsinnaaneq Kalaallit Nunaannut iluaqutaassagaluarpoq. Taamaasilluni suliffeqarfiit ajornannginnerusumik Kalaallit Nunaanni sulilersinnaagaluarput, aamma suliffeqarfiit amerlanerusut Kalaallit Nunaanni ammarneqarsinnaagaluarput, tamanna Kalaallit Nunaata aningaasaqarneranut iluaqutaassagaluarpoq, Damien Degeorges nassuiaavoq.

Islandimi naalakkersuisuusut EU-mi ilaasortanngornissaq soqutigisarinngilaat. EU-mili killeqanngitsumik niuersinnaanermut peqataanissaq periarfissatsialattut isigineqarpoq. Islandimummi aningaasaqarneranut iluaqutaavoq, Damien Degeorges nassuiaavoq.

EU-mi niueqatigiinnermut Kalaallit Nunaat ilaasortanngussagaluarpat tamanut iluaqutaaginnassasoq Damien Degeorges oqarpoq.

Kalaallit Nunaata Bruxellesimi aallartitaqarfiani Naalakkersuisoqarfinni assigiinngitsunit aamma sulisoqalersinnaagaluarpoq.

Kinguaariit tullianut suliaq
EU aamma Kalaallit Nunaat suleqatigiinnerat annertusiartorpoq, tamanna qaammammi kingullermi atsioqatigiittoqarnerata takutippaa.

Suleqatigiinnissamik atsioqatigiinnerup aalajaassusaa ersersinneqartoq Damien Degeorgesip atsioqatigiittoqarnera pillugu oqaaseqarpoq. EU-mi periarfissaasinnaasut assigiinngitsut Kalaallit Nunaata atsioqateqareernermi kingorna takusinnaassagai oqaatigaa.

Aningaasaqarnikkut unammillernartoqarnera pissutaalluni EU-mi periarfissaasinnaasut assigiinngitsut ujartorneqarnissaat Kalaallit Nunaannit misissuiffigineqartariaqartut Damien Degeorgesip oqaatigaa.

Inatsisartunut qinersinissamut EU pillugu oqallittoqarnera soqutiginartutut isigaa.

Tassami Demokraatit EU-mi periarfissanut ammasumik oqallittoqarnissaanik oqariartuuteqartuuvoq, Ilimmarfimmilu oqallittoqareernerata kingorna ilinniartunit qinersititsisuusaartoqarnerani taaguunneqartuartuulluni. Tamanna takutippaa Kalaallit Nunaat EU pillugu nutaamik oqallittariaqalersoq, Damien Degeorges oqarpoq.