Dagsværk: Ilinniarnertuunngorniat suliniutinut assigiinngitsunut katersuiniartut

Danmarkimi Kalaallit Nunaannilu inuusuttut ilinniarfiini ilinniartut suliniummut, kalaallit inuusuttut namminneq siunissaminnik pilersitsisinnaanerat anguniarlugu suliniutaasumut, aningaasanik katersuiniarput.

Danmarkimi inuusuttut ilinniaqqiffinni ilinniartut atuarnerminni ulloq ataaseq atuaratik suliffeqarfinni assigiinngitsuni sulisarput, taamaasiornikkut nunarsuaq tamakkerlugu suliniummi, Operation Dagsværkimik taallugu ingerlanneqartartumi peqataasarlutik. Tassa inuusuttoqatiminnut suliniutinut aningaasanik katersisarlutik. Kalaallillu inuusuttut siullermeerlutik ullumi katersuiniaqataapput.

Aningaasallu siullermeerlutik Kalaallit Nunaanni aamma atorneqassapput. Operation Dagsværkip suliniut, Ungdommens Røde Korsip Kalaallit Røde Korsiatalu ingerlataat katersuiniarfigissallugu toqqarsimavaa. Suliniutip inuusuttut unammillernartunut piareersimanerunissaat anguniarpaa.

-Immitsinnut paasisinnaavugut, Kalaallit Nunaat danskit naalagaaffianut ilaavoq, taamaattumillu assigiittorujussuuvugut. Taamaakkaluartoq Kalaallit Nunaanni inuusuttut ilinniarnerup iluani allaanerujussuarnik periarfissaqartinneqarput, Johanna Munch Skylv, Operation Dagsværkimi allaffimmi kajumissutsiminik suliaqartoq oqarpoq.

Danmarkimi inuusuttut ilinniartut tusintilippassuit operation dagsværkimi ukiut tamaasa peqataasarput. Ullormi tassani, ilinniagasserinermi ikiuullutik, orpippassuarni suliaqarlutik, filmilianik katitereqataallutik allanilluunniit suliffinni suliaqarlutik, akunnerni tallimani sulisarput, 350 koruuninillu akissarsisarlutik suliniutinut tunniussassamminik.

Aningaasat katersorneqartut Kenyami, Guatemalami Bangladeshimilu suliniutinut ukiuni siuliini atorneqartarsimapput, ukioq mannali suliniutit avannarpasinnerusuniittut taperserniarneqarput.

-Kalaallit Nunaannut tunngasunik ilisimasakinnerput tupaallaatigingaatsiarparput, Johanna Munch Skylv oqarpoq nangillunilu Kalaallit Nunaanni inuusuttut unammilligassarisartagaat Danmarkimi inuusuttunit annilaarutigineqarsimasut.

Kalaallit Nunaanni inuusuttut kiserliortut, pinngitsuuisinnaajunnaartut, ilinniakkamik unitsitsiinnartut imminullu toquttut kisitsisinngorlugit amerlangaatsiarput. Tamanna inuusuttut 13-it 15-illu akornanni ukiullit 90 procentiisa ilinniagaqarnissartik takorluugarigaluaraat, taamaattoq amerlangaatsiartut ilinniagaqanngitsoortarput.

Takorluukkat allanngortitsinerillu

Taamaammat inuusuttut 1000-it inuiaqatigiinni nammineerluarsinnaalernissaannut ilinniartinnissaannut aningaasat ukioq manna atorneqassasut aalajangerneqarpoq, suliniummi kalaallit inuusuttut periarfissaminnik inerisaasinnaanissaat anguniarneqarpoq.

Inuusuttut namminneerlutik takorluukkatik piviusunngortissinnaanissaat allannguisinnaanissaallu anguneqassasoq neriuutigineqarpoq.

Kalaallit Røde Korsianni inuusuttunik siunnersorti Erni Kristiansenip oqarnera naapertorlugu, inuusuttut ilinniakkaminnik unitsitsiinnartartut imminnullu tatiginngitsut ukiuni arlalinni amerlapput.

Taanna isumaqarpoq inuusuttut siusippallaartukkut nammineertitaasalertarnerannit ajornartorsiut aallaaveqartuusoq.

-Inuusuttorpassuit assersuutigalugu nunaqarfinni najugaqarput, meeqqallu atuarfiat naammassiniarlugu amerlasoorpassuit illoqarfinnut kisimik nuuttariaqartarput. Taamaalioraangamik ilaquttatik tamaasa qimattariaqartarpaat, tamanna kiserliornarsinnaasarpoq, Erni Kristiansen oqarpoq.

Erni Kristiansen nammineerluni 14-inik ukioqarluni ilaquttani qimallugit illoqarfimmut nuuttariaqarsimavoq, najugarisamini ilinniarsimasunik ilinniartitsisunik naammattunik peqanngimmat.

Ilaquttallu qimallugit najugaqartariaqarneq inuusuttunut oqitsuinnaanngilaq, pingaartumik illoqarfigilikkami sunngiffimmi sammisassakitsillugu.

-Inuusuttut naapikkaanni apeqqutigikkajuppaat sumi inuusuttoqatinik naapitsisoqarsinnaanersoq. Inuusuttut inuusuttoqatiminnik naapitsinissaminnik amigaateqarput.

-Timersortanngikkaannili allanik periarfissaqarpianngilaq – ajoraluartumillu inuusuttorpassuupput inuiaqatigiit aaqqissuussaaneranni tulluutinngitsunik, Erni Kristiansen oqarpoq.

Danmarkimi inuusuttut Operation Dagsværkimi suliaqartut saniatigut Nuummi GU-mi ilinniarnertuunngorniartut suliniummut katersuiniaqataallutik suliaqarput. Nunatsinni siullermeerlutik inuusuttut ukioq manna katersuiniaqataapput.

Powered by Labrador CMS