D: Uran pillugu oqallinneq kinguartilli

Demokraatit piumasaraat uranimut naaggaarluinnarnerup atorunnaarsinnissaata aappassaanneerlugu suliarinissaa aappaagumut kinguartinneqassasoq. Illuatungiliuttut taakku isumaqarput uran pillugu ilisimasariakkat misissorluarnissaannut piffissaq sivikippallaartoq.

Uranimut naaggaarluinnarnerup atorunnaarsinnissaa pillugu Inatsisartuni oqallinnermi oqalussinnaatitaaffitsik atorlugu Demokraatit piumasariniarpaat aappassaanneerneqarnera aappaagumut kinguartinneqartariaqartoq.

- Pingaartorujussuuvoq uranimut naaggaarluinnarsimanerup atorunnaarsinnissaa pillugu aalajangerneq pissasoq innuttaasut toqqissisimanarisaannik. Ullumikkut malugisinnaavara toqqissisimannginneq annertuallaartoq, Demokraatit siulittaasuat Jens B. Frederiksen Sermitsiaq.AG-mut oqarpoq.

Uran pillugu nalunaarut nutaaq qallunaat kalaallillu suleqatigiit suliaat ataasinngornermi saqqummerpoq, tamatumalu kingorna Demokraatit piumasarisimagaluarpaat siullermeerineq oktoberip 24-ni pissasoq aappassaanneerneqarfissaraluani.

- Nalunaarut kisimi atuagassaanngilaq. Aamma nalunaarummut ilanngusanik quppernepassuarnik ilaqarpoq uagullu Demokraatiniit misissueqqeqqaarluta isummertarpugut. Taamaattumik isumaqarpugut ilisimasat iserfigilluarnissaannut piffissaq sivikippallaartoq, Jens B. Frederiksen oqarpoq.

Demokraatit siunnersuutigaat aappassaanneerneqarnissaa aappaagu upernaakkut imaluunnit ukiakkut Inatsisartut katersornissaannu aappassaanneernissaa kinguartinneqassasoq.

- Taava piffissaq atorsinnaavarput immikkut ilisimasallit innuttaasunik ataatsimiisitseqattaarlutik angalatinnerannut. IAp Inatsisartuni ilaasortai imaluunniit Doris Jakobsen Siumumeersoq uranimut ilisimasalittut saqqummissanngillat. Immikkut ilisimasallit politikkerinit akuliuffigineqaratik ilisimasanik innuttaasunut saqqummiussuisariaqarput, Jens B. Frederiksen oqarpoq.

Taassuma kissaatigaa uranimut naaggaarluinnarnerup atorunnaarsinnissaa sapinngisamik partiit amerlasuut isumaqataaffigisaannik atorunnaarsinneqassasoq.