D sinnerlugu qinigassanngortittup Inatsisartuni ilaasortat 21-nut ikilisikkusukkai

Demokraatit sinnerlugit Inatsisartunut qinigassanngortittup Bo Martinsenip Inatsisartuni ilaasortat 31-usut 21-nut ikilisikkusuppai. Aningaasanik sipaarniartoqartillugu politikkerit siulliullutik sipaaruteqartariaqartut oqaatigaa.

Bo Martinsen (D) isumaqarpoq, atugarissaarnerulernissamut akissaqarniarluni aningaasanik sipaaruteqartoqarniartillugu politikkerit siulliullutik sipaaruteqartariaqartut.

- Ilumoortuusinnaanngilaq politikkerit ukiut tamaasa akitsuutinik akileraarutinillu qaffaasoqannginnissaanik neriorsuuteqariarlutik qineqqusaarnermi millionerpassuarnik nalilinnik neriorsuuteqartarnerat. Akiligassarli akilerneqartussanngoraangat ajornannginnerpaamik iliuuseqapallattarput - akileraatutit qaffattarpaat imaluunniit nutaanik akitsuusersuisarput, taanna tusagassiorfinnut nalunaaruteqarluni allappoq.

Siulittaasuatalu taperserpaa.

- Pitsanngorsaataasinnaasunik siunnersuuteqaraangatta siunnersuutitta qanoq naleqasinnaanerisa ilanngunneqartarnissaat isumaqatigilluinnarpara, aamma sipaarniartoqartillugu uagut politikkerit salliusariaqarnerput. Aningaasa innuttaasut kaasarfiannit pissarsiariniartassanngilavut, Jens-Frederik Nielsen Sermitsiaq.AG-mut oqarpoq.

Politikkerit ikilisinneqarlik

Bo Martinsenip siunnersuutigaa, Inatsisartuni ilaasortat ullumikkut 31–usut 21-nut ikilisinneqassasut.

- Tamanna nunamut arlalippassuartigut sunniuteqarluassaaq. Innuttaasut 56.000-iuvugut, ilaasotallu 31-oqqissaarnissaat ilumoorsinnaanngilaq. Inatsisartuni ilaasortatut suliassat ilaasortanit 21-usunit kivinneqarsinnaalluarput, taanna oqarpoq.

Bo Martinsenip oqaatigaa, ilaasortat ikilisinneqarnerisigut ilaasortanut aningaasarsiaqartitsisarnermut sipaaruteqarnikkut, partiinut tapiissutaasartutigut sipaaruteqarnikkut aamma angalasarnernut najugaqartarnernullu aningaasartuutikinnerulernikkut ukiumut minnerpaamik ti millioner koruuninik sipaaruteqartoqartassasoq.

Innuttaasunut 1800-nut politikkeri ataaseq

Jens-Frederik Nielsenip oqartussaaqataanerup qanoq akeqarnera takorusuppaa, sipaaruteqarniarnermulli tunngatillugu erseqqinnerusumik oqaaseqarani.

- Isumaqatigaara nunami 56.000-inik innuttaqartumi Inatsisartunut ilaasortat 31-unerat amerlavallaartut.

Piffissaq ungasinnerusoq eqqarsaatigalugu ilaasortat ikilisinneqarsinnaappata, Kalaallit Nunaanni innuttaasunut 1800-nut inatsisartunit ilaasortaq ataaseq sullissisuusassaaq, taanna oqarpoq.

Assersuutigalugu Danmarkimit folketingimi ilaasortaq ataaseq innuttaasunut 32.000-inut sullissisarpoq.

Bo Martinsen isumaqarpoq, assersuutigalugu nunami utoqqaat atugarissaarnerulernissaannut aningaasanik tamanna pissarsiffiulluarsinnaasoq.

- Akornatsinni sipaarutaasinnaasunik nassaarniartariaqarpugut, maannamut politikkerit iliuuserisartagaannut taarsiullugu – tassa akiligassamik innuttaasunut ingerlatsitseqqittarnermut taarsiullugu, taanna oqarpoq.

Powered by Labrador CMS