D-mi siulittaasoq: Iluarsaanissamut akisussaaffik Immanuelsenimiippoq
Demokraatit siulittaasuata Jens-Frederik Nielsenip ingerlatsinermik misissuineq annertusisaq tunuliaqutigalugu aalisarnermut naalakkersuisoq Jens Immanuelsen tunuartinnianngilaa.
Aalisarnermut naalakkersuisoqarfimmi ingerlatsinermik misissuineq annertusisaq “tukattorujussuarmik akuersaarneqarsinnaanngitsumik” saqqummiussaqartoq, Jens-Frederik Nielsen isumaqarpoq, Drmokraatilli siulittaasuat, aamma aatsitassanut inuussutissarsiornermullu naalakkersuisuusoq, sooq Jens Immanuelsen akisussaatitaasariaqarnersoq paasisinnaanngilaa.
- Naalakkersuisup akisussaasuutinnissaa tulluanngilaq, Jens-Frederik Nielsen oqarpoq, taamaalillunilu Partii Naleqqap ingerlatsinermik misissuineq tunuliaqutigalugu Jens Immanuelsenip erngertumik tunuarnissaanik piumasaqaataa akerlilerpaa.
- Ingerlatsinermik misissuinerit tamakku Kukkunersiunermut Ataatsimiititaliap aallartitai tikilluaqqusorujussuuakka. Naammaginartumimmi sulinersugut taamaaliornikkut misissuisoqarsinnaavoq. Pisortanilu ingerlatsinitsinni pitsanngoriartuaannarsinnaavugut pitsanngoriartuartussaallutalu, Jens-Frederik Nielsen oqarpoq.
Ingerlatsinermi suliassaq
- Naalakkersuisoq akisussaasuni qullersaavoq, kisianni una allaffissornikkut ingerlatsinermi suliaasoq eqqaamasariaqarparput. Taamaammat ingerlatsinermi tukattoqarnera aatsaat iluarsisinnaanngikkuniuk politikkikkut akisussaatiinnarneqartariaqartoq isumaqarpunga, Jens-Frederik Nielsen naqissusiivoq, nangillunilu:
- Demokraatilli tungaannit suliat taamaattut ilungersunartutut isigigigut isertuunneqassanngilaq. Soorunami pissutsit ilungersunartut aaqqinneqarnissaannut naalakkersuisoq Jens Immanuelsen siuttuussasoq piumasaraarput.
Eqqissisimasoq
Ingerlatsinermi misissuinerup ajornartorsiutit qulaajarsimasai Jens Immanuelsenip aaqqiivigileruttornerarmagit, Jens-Frederik Nielsenip eqqissisimassutigaa.
- Jens Immanuelsenip naalakkersuisoqarfimmini allaffissornikkut ingerlatsinerup iluarsissagai naatsorsuutigaara, Jens-Frederik Nielsen ilisimatitsivoq.