D: Ilinniagaqarnersiutit qiorneqartassappat?

- Kalaallit Danmarkimi ilinniagaqartut, danskit SU-annik pisartagaqartut sinaakkutimikkut ilanngaanneqartarpat, Kalaallit Nunaanni siusinnerusukkut ilinniakkaminnik naammassinnissimagunik?

- Naalakkersuisut pilersaarutiginerlugu ilinniarnermik qiortartakkanut malittarisassanik allanngortitsiniarlutik, ilinniartut sinaakkutimikkut ilanngaavigineqarsinnaajunnaarsillugit, allamik ilinniakkaminnik siusinneusukkut naammassinnissimagunik?

- Taamaanngippat, Naalakkersuisut isumaqarnerlutik, ilinniartut qaffasinnerusunik ilinniarsinnaassanngitsut, ilinniakkamik ataatsimik naammassisaqareersimagunik?

Inatsisartunut ilaasortaq Demokraatineersoq Michael Rosing Naalakkersuisunut paragraf 37 naapertorlugu apeqquteqarpoq.

2013-imi aamma tamanna apeqqutigineqareerpoq, tassani ilinniagaqarnersiutit nungukkaangata qanoq pisinnaatitaaffeqartoqarnersoq apeqqutigineqarluni. Ilinniagaqartumut ingerlaqqiffiusumik ilinniarnermik atuagarsornermik aningaasarsiaqarfigisamillu ilinniarnermut atatillugu suliffimmiinnermi sinnerseraaffiusumik naammassisaqarsimasumut, ilinniarnermi atuagarsornermut atugassat sinnerlugit qiugarisimasinnaasanik ilallugit ilinniagaqarfigisassatut atugassat assinginik qiugassanik killissarititamini ilanngaavigineqassasoq Naalakkersuisut apeqqummut tassunga akipput.

Malittarisassani allaqqavoq ilinniartut 82-eriarlutik ilinniagarnersiutaat qiorneqarsinnaasut. Nungussimappatalu nammineerluni aningaasassat ujartorneqartariaqarlutik.

- Demokraatini ilisimavarput, Ilimmarfimmi ilisimatusartoqartoq ingerlaqqiffiusumik ilinniakkaminnik naammassinnissimasunik taamaattumillu qiortartakkaminnik qiorsivigineqareersimasunik. Tamatuma kingunerisimavaa, qiortartagaat sinneqarsimapput bachelorinngornissaminnut naammaannartunik sussaqaratilli kandidatinngornissaminnut, ilinniarnersiutisiaqarlutik. Taamaattumik suliffissarsiortariaqartarput kandidatinngoratik suli. Tamatuma ilinniarneq sivitsorsartarpaa sivikinngitsumik. Demokraatini taamaattumik neriuppugut, ajornartorsiut aaqqiivigineqarsinnaajumaartoq, taamaasillutalu kandidatinngortitsisarsinnaajumaartugut ilinniarnersiutisiaqartillugit, Michael Rosingip apeqquteqarnini nassuiarpaa.

Kalaallit danskilluunniit ilinniagaqarnersiutaat pillugit nalorninartumik Sermitsiaq.AG marlunngormat saqqummiussaqarpoq. Paatsiveerusimaartoqarsimappat tamanna aaqqiissuisoqarfimmit utoqqatitsissutigaarput.