D: Aningaasaqarneq tunngaviusumik inatsimmit nutaamit pingaarneruvoq

Kalaallit Nunaata aningaasaqarnini patajaallisinnissaa amigaatigimmagu namminersulivinnissamut eqqarsaatit kigaallisinneqarallassapput.

Partii naalakkersuisooqataasoq Demokraatit taama isumaqarpoq.

Taamaalilluni partii naalakkersuisooqatimi, Siumup, Inuit Ataqatigiit aamma Partii Naleraq peqatigalugu tunngaviusumik inatsisiliornissamut piareersaataasumik isumalioqatigiisitaliornissamut kissaataannut akerliuvoq.

Atuaruk: Nunatta tunngaviusumik inatsisissaata naalakkersuisooqatigiit avissaartuutsippai

Imminut napatittariaqarpoq pilersorlunilu
- Tassami naalagaaffiup oqartussaaffiit 32-t ullumikkut suli isumagai. Soorunami oqartussaaffiit takku tiguneqartariaqarput naalagaaffittut namminersortutut suaarutigilinnginnitsinni, Demokraatit politikkikkut oqaaseqartartuat Randi Vestergaard Evaldsen partii sinnerlugu taama allappoq.

Taassuma oqaatigaa, naalagaaffik namminersortoq naalagaaffimmiit tapiissutinik pisartagaaruttussaasoq. Aamma naalagaaffik namminersortoq aningaasarsiornikkut imminut napatittariaqartoq pilersorlunilu.

- Aningaasaqarnerput minnerpaamik 5 milliardit koruuninik pitsanngoriartittariaqarparput. Maanna 2016-mut aningaasanut inatsisissatut siunnersuummi amigartuulaarnissaq tagginneqarpoq, taamaammat namminersorluta naalagaaffinngornissatsinnut akisaqaqqajanngilagut, politikeri erseqqissaavoq.

Akisuallaarpoq
Inatsisartuni partiit arlallit maanna tunngaviusumik inatsisiliornissamut isumalioqatigiissitamik pilersitsisoqarnissaa pisariaqalereersoq - isumalioqatigiissitaq qularnanngitsumik 10 aamma 20 millionit koruunit akornanni akeqartussaatut partiit taakkua nalilersorsimavaat.

- Sulissutigeqqaartariaqarparput Namminersorneq pillugu Isumaqatigiissummut atatillugu oqartussaaffiit tigusassatta tigoqqaarnissaat, Randi Vestergaard Evaldsen uparuaavoq.

Demokraatilli aamma isumaqatigaat piffissaq ungasinnerusoq isigalugu naalagaaffinngornissaq sulissutigissagallugu, partiili isumaqarpoq torersumik tulleriiaarisoqartariaqartoq.

- Sulissutigeqqaarlugu aningaasaqarnitta patajaattunngornissaa piffissallu ingerlanerani oqartussaaffiit tigusinnaasagut tigoorarlugit asuli aningaasat atornagit tunngaviusumik inatsisiliornissaq pillugu isumalioqatigiisitaliornermut, taakkumi suliaat aatsaat siunissami ungasissumi iluaqutigisinnaanngortussaavagut, Demokraatit taama oqariartuuteqarput.

Aamma atuaruk: Partii Naleraq: Namminersulivinnissamut qaninnerulissaagut