CSR: Aningaaserivmmi pisortaq ataatsimut siunnerfeqarnissamik amigaateqartoq
Suliffeqarfiit imminut napatinnissaq Nunasuarmilu anguniakkat pillugi namminneerlutik iliuuseqarsinnaapput, Namminersorlutilli Oqartussat iliuuseqartariaqartut ataatsimullu siunnerfissamik suliaqarlutik, aningaaserivimmi pisortaq isumaqarpoq.
Imminut napatinnissaq, Corporate Social Responsibility (CSR) aamma FN-p Nunarsuarmi anguniagai suliffeqarfiit ingerlatsinissamut pilersaarutaannut periusissiaannullu ilaatinneqaleriartuinnarput. Aningaasatigut ingerlataqarfinnut tamanna isumaqarpoq, imminut napatinnissap annertussusaa, tunisassiat ataasiakkaat sullitanut neqeroorutigineqartartut tunngavigalugit nalilerneqassasoq.
-Nunarsuarmi anguniakkat sunut tamanut ilannguttalertussaavavut. Iliuutsivut iliuuseriniakkavulluunniit siunissami piumasaqaataalersussanut naapertuunnersut maannangaaq isummerfigereertariaqarpavut, Grønlandsbankenimi pisortaq Sermitsiaq.AG-mut oqarpoq.
Januar 2021 aqllarnerfigalugu aningaasaliiffigineqartussat imminut napatissinnaanermik ilisarnaaserneqartalertussaapput, siunissamilu taarsigassarsiaritinneqartunut namminerlu taarsigassarsianut tamatuma ilaatinneqarlernissaa aningaaserivimmi pisortap naatsorsuutigaa.
Nunat tamalaat tatisinerat
Nunamulli tamarmut pingaarnertut periusissiassaq Naalakkersuisut isumagisariaqarpaat, Martin Kviesgaard erseqqissaavoq.
- Namminersorlutik Oqartussanit Nunarsuarmi anguniakkat imminullu napatinnissaq arlaleriarluni oqaatigineqartarsimapput, nunalli tamalaat nunanut tamanut suliffeqarfinnullu tamanut naatsorsuutaat annertusiartuinnavipput, pisortaq oqarpoq.
Vittus Qujaukitsup januar 2019-imi nalunaarutigaa, naalakkersuisoqarfiit susassaqarfimminniinnaanngitsoq, oqartussaqarfinnili tamani Nunarsuarmi anguniakkanik ilanngussinissaat siunertaralugu Namminersorlutik Oqartussat suliamik annertuumik aallartitsisimasut.
- Pingaartuik inuussutissarsiornerup, ilinniartitaanerup, peqqissutsip isumaginninnerullu iluini susassaqarfiit akimorlugit eqqarsartoqarnissaa pisariaqarpoq, taakkuugamimmi kissaatigisatut iluatsitsisoqassappat imminnut ataqatigiilluinnartut, taamanikkut oqaatigineqarpoq.
Anguniakkanik annertuunik takorusuttoq
Martin Kviesgaard isumaqarpoq, Namminersorlutik Oqartussanit tigussaanerusumik iliuuseqartoqartariaqartoq. Taassuma ernummatigivaa, suliaq aallartinneqassappat qanoq iliuuseqartoqartarneranik qulaajaasoqaannarnissaa, tassa siunissami qanoq iliortoqarsinnaaneranik sammisaqartoqarani.
- Namminersorlutik Oqartussat nuna sinnerlugu anguniaqagarnerusinnaapput. Siunnerfissatsinnik taanna malillugu iliuuseqarfigisinnaasatsinnik amigaateqarpugut. Suliffeqaerfittut tamanna pisariaqartipparput. Nunamut suna pingaarnerpaava? Nunarsuarmi anguniakkat qaffasippallaalaartut, kalaallit Nunaanni atorneqarsinnaasunngorlutik appartinneqartariaqarput, pisortaq oqarpoq.