CSR nunani avannarlerni ataatsimeersualersoq
Nunatsinni suliffeqarfiit 50-iniit amerlanerusut peqquserlunnermik akiuiniarneq, inuit aamma sulisut pisinnaatitaaffii suliffeqarfiillu inuiaqatigiit akornanni akisussaaffimmik tigusinissaat pillugit novembarimi ataatsimeersuartinneqassapput.
Piujuaannartitsilluni ingeriartorneq suliffeqarfiullu inuiaqatigiit akornanni akisussaassusilik suuppat? Taakkua pillugit CSR ukiormoortumik nunani avannarlerni Global Compactimik taallugu Nuummi novembarimi ataatsimeersuartorneqarnerani sammineqassapput.
- FN-ip tunngaviinut qulinut global compactip ataaniittuni suliffeqarfiit atsiorsimasut ilaatigut qanoq inuiaqatigiinut akisussaaffimmik tigusisimanerlutik suliffeqarfinnullu allanut isumassarsititsisinnaasunik saqqummiissapput. Piujuaannartitsinermi suliaqarnermi tunngasinnaavoq imaluunniit sulisut atugassarititaanut, Ivinnguaq Kristiansen, CSR Greenlandimi attaveqaqatigiinnermi sulisoq oqarpoq.
Nunani tamalaani global compacteqarpoq, kisianni aamma immikkut nunani avannarlerni global compacteqarluni. Nunanilu avannarlerni global compact maanna ingerlanneqalersumi CSR Greenland npvembarimi 2021-mi qaaqqusisuuvoq.
Nunani avannarlerni suliffeqarfiit angisuut oqalugiassapput
Aaqqissuusaq ulluni marlunni ingerlanneqassaaq. Ulloq siulleq paasissutissiinermik atorneqassaaq, tassani suliffeqarfiit CSR-imut suli atsiorsimanngitsut aamma peqataasinnaallutik.
- Novembarip qulingiluaani paasissutissiilluni ataatsimiinermi nalunaaqutaq 13.00-imiit 14.30-ip tungaanut peqataasinnaavutit. Tunngaviit, Global Compactimi sulineq FN-imilu nunarsuarmi anguniarneqartut pillugit saqqummiussisoqassaaq. Peqataaneq akueqanngilaq pisussallu Sulisitsisuni ingerlanneqassalluni. CSR Greenland paasissutissiivoq.
Pingasunngornermi novembarip qulingani suliffeqarfiit piujuaannartitsineq eqqarsaatigalugu isumassarsianik assigiinngitsunik pissarsiaqarsinnaapput.
- Suliffeqarfiit nunani avannarlerneersut angisuut oqalugiartussaapput. Tassani ilaatigut piujuaannartitsilluni ineriartorneq, peqquserlunnermik akiuiniarneq suliffeqarfinnilu sulisut atugassarititaat pitsanngorsarneqarnissaat ilaatigut oqalugiaatigineqassapput, Ivinnguaq Kristiansen oqarpoq.
Suliffeqarfiit soorlu, FLSmidth, Chr. Hansen, Vækstfonden, Isavia, Icelandair, Marel, Air Greenland aamma Ørsted allarpassuillu oqalugiassapput.
Ataatsimeersuarneq Hotel Hans Egedemi ingerlanneqassaaq uungalu peqataanissamut nalunaartoqarsinnaavoq: csr@csr.gl.