Skip to main content

Crossfit: Grødem normu 12-inngortoq

Crossfit Gamesimi kalaallinit peqataaqqaartoq Maria Grødem ’Fittest on Earth’ pillugu unammisunit 20-usunit peqataaffigineqartumi normu 12-inngorsimavoq.

USA-mi Crossfit Gamesimi unammeqataasimasoq nuannaarluni naammagisimaarinnillunilu angerlarsinnaanngorpoq.

- Naatsorsuutigisanniit angusaqarnerusimaqaanga, Maria Grødem Sermitsiaq.AG-mut oqarpoq. 

Crossfitsimi unammeqataasimasup aappaagu tamaviaarnerunissani anguniarlugu, ukioq manna unammersuartoqarnera sapinngisaminik ilinniarfiginiarlugu aalajangiussimavaa. Ullormili siullermi unammisoqarnerani angusaqarluarami, pitsaanerit qulit akornanniinnissani neriuutigileraluarsimallugu Maria Grødemip oqaluttuaraa.

- Tamanna maannakkut ajoraluartumik iluatsinngilara, normu 12-inngornerali naammagisimaarluinnarpara, taanna oqarpoq.

Anngunniunnermi inissisimaffini pitsanngortissimagaa

Maria Grødem 40-niit 44-nut ukiullit Crossfit Gamesimut/ Crossfitsimi VM-ertoqarnissaanut anngunniunnermi nunarsuarmi normu 13-itut inissikkami, unammersuartoqarnissaanut annguppoq. Madisonimi, USA-miittumi nunarsuarmi pissartanngorniunnermi nammassineqaqqammersumi normu 13-itut inissisimanini pitsaanerulersippaa.

Maria unamissutini arfineq-pingasuusuni unammeqataasimavoq, sisamariarluniluni peqataasunit 20-usunit pitsaanerpaat qulit akornanniissimalluni.

- Unammissutigineqartut ilaanni pitsaanerit akornanniilluni misigisaq nuanneqaaq. Nalulluni unamminissaq ernummatigisimaqaara, anigorparali aamma peqataasimanera naatsorsuutigisimasannit ilinniarfiginerusimavata, Maria Grødem oqarpoq.

The Crossfit Games-imut anngunniarneq sivisullunilu oqimaassimasoq

Maria Grødemip juulip 19-ani Wisconsinimi Madisonimut tikinnissaanut aqqut aporfeqartarsimaqaaq.

Nunarsuarmi pitsaanerpaat 20-t, The Gamesimut anngussimasut akornanniilernissamut anngunniarluni ukiuni marlunni ullut tamaasa nalunaaquttap akunnerini sisamani-arfinilinni sungiusartarsimanerata saniatigut, angalanissamut killilersuinerit, akiuussutissalersuinerit, unammersuarnerup ingerlanneqarsinnaaneranik qularuteqarnerit il. il., silarluttarnera aporfiusarsimapput.

- Ullumikkut maaniinnera qujamasuutigeqaara. Tamanna anguniarlugu ukiuni arlalinni sungiusartarsimavunga, maannalu inuit qummut isigisakka, tassalu nunarsuarmi crossfitsertartut pitsaanersaat sanileralugit maani nikorfavunga. Angalasarninni angalaneq manna ilinniarfiginerpaavara aamma unarmersuariartarninni aatsaat taamak unammersuarnermut taamak annertutigisumut peqataaneq misigisanni annersaavoq, Maria Grødem nuannaarluni naggasiivoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER