Covid pillugu nalunaarusiaq: Innuttaasut 6900-ngajaat ikinnerpaamik ataasiarlutik misissortereerput
Kalaallit Nunaanni innuttaasut coronavirusimut ukiup affaani kingullermi misissortissimasut 6850-iupput. Misissortittut quliungaangata sisamat Kalaallit Nunaata avataani najugaqartuusarput.
COVID-19-ip nunatsinni nakkutilliivigineqarneranut atatillugu Kalaallit Nunaanni Peqqinnissaqarfik aamma Nakorsaaneqarfik nalunaarusiorsimapput. Nalunaarusiap takutippaa sapaatip akunnera kingulleq ilanngullugu misissugassat 7.480-t tiguneqareersimasut. Misissugassat ilaat suli akissutisineqanngillat, taamaattumillu nakorsaaneqarfiup nittartagaani nalunaarsorneqarsimanatik.
Misissugassat 7480-iusut, inuit 6850-it misissorneqarsimapput. Taakkunannga 2.500-t sinneqartut Kalaallit Nunaata avataani najugaqarput, inuillu amerlanerpaamillu inuit 630-t ikinnerpaamik marloriarlutik misissungassamik tigusiffigineqarsimallutik.
Kommuneqarfik Sermersooq misissugassanik tigusiffiunerpaajuvoq, tassani COVID-19-imut misissugassat 4304-t misissorneqartussatut tiguneqarsimammata.
Avannaata Kommuniani misissugassanik 791-inik, Kommune Kujallermilu 680-inik tigusisoqarsimavoq.
Arnat inuusunnerit amerlanerupput
Kalaallit Nunaat martsimiilli katillugit 14-inik coronavirusimit napparsimasoqarsimavoq. Napparsimasimasut tamarmik peqqissisimapput. Pissutsit killiffiat pillugu nalunaarusiami, nakorsaanerup Sermitsiaq.AG-mut tunniussaani, takuneqarsinnaavoq arnat arfineq-pingasut aamma angutit arfinillit nunatsinni COVID-19-imik napparsimasimasut.
Napparsimasimasut ilarpassui 40-t ataallugit ukioqarput. Kisitsisit naapertorlugit nunatsinni coronavirusimik napparsimasimasut arnat sisamat aamma angutit marluk 40-t ataallugit ukioqarput.
Nalunaarusiami aamma atuarneqarsinnaavoq napparsimasut COVID-19-imut ersiuteqarlutik pasitsaanneqartut Nuummi Dronning Ingridip Napparsimmavissuanut unitsinneqartartut takornartaanngitsut.
Ullut 12. september aamma 18. september akornanni inuit pingasut COVID-19-imut ersiuteqarlutik pasitsaanneqartut misissorneqarnerminni uninngatinneqarsimapput.
Kalaallit Nunaanni coronavirusimik napparsimasunik maannamut suli nassaartoqaqqissimanngilaq. Nakorsaanerup Henrik L. Hansenip tallimanngornermi tusagassiortunik katersortitsinermi oqaatigaa sapaatit akunnerni marlunni kingullerni inuit pingasut COVID-19-imik napparsimasut paasineqarsimasut Danmarkimiit nunatsinnukarnissamut angalanissamut itigartinneqarsimasut. Ilanngullugu erseqqissarpaa coronavirusimik napparsimasumik nunatsinnut tikittoqarsimasinnaanera ilimanaateqarluartoq.