Covid-19: Tunillatsittut nutaat 41-t
Coronavirusimik tunillatsittut nutaat 41-t tallimanngormalli decembarip pingajuanili nassaarineqarput. Tunillatsissimasut marluk Ikerasammi nassaarneqarput, pingasut Ilulissani Nuummilu 36-it nassaarineqarlutik. Qasigiannguanilu coronaviruseqareersimanermi uppernasaalluni misissuinermi 59-it tunillatsissimasut paasineqarput.
Maanna pisortatigoortumik Nunatsinni 202-t tunillatseqqapput, oqartussallu tunillatsissimasut nutaat 41-t tallimanngormat decembarip pingajuaniit paasivaat. Uummannap eqqaani Ikerasammi tunillatsissimasut nutaat marluk nassaarineqarput, Ilulissani pingasut Nuummilu 36-it tunillatsissimasut paasineqarpoq.
202-t maanna tunillatseqqasuni coronaviruseqareersimanermi uppernarsaalluni misissortittut 59-t ilaatinneqanngillat.
Qasigiannguani 53-inik tunillatsissimasunik nassaartoqareersorlu sukkasuumik / coronaviruseqareersimanermi uppernarsaalluni misissortissinnaaneq atuutsinneqalerpoq. Tassani Danmarkimi Falck-imeersut sulisut tallimat misissuisuupput. Sapaatiuppat 736-it misissortipput, taakkunannga 59-it coronaviruseqareersimasutut paasineqarlutik.
Inuit taakkua misissortissimasut PCR-testimik misissortipput, misissuinerillu Nuummut nassiunneqarlutik. Nuummi misissorneqarnerini 59-iusuni qassit tunillatsissimanersut paasineqarsinnaalissaaq.
Utoqqaat illuani tunilatsittoqarsimanngilaq
Qasigiannguani sapaatip akunnerata siuliani PCR atorlugu misissortinnerit suli Nuummut apissinngillat ullulli ingerlanerani Nuummut apuunissaat naatsorsuutigineqarpoq.
Utoqqaat illuani misissortittut tamarmik tunillatsissimanngitsut, nunatta nakorsaaneqarfiata paasissutissiissutigaa.
- Nuummi suli napparsimavimmi uninngasoqarpoq, taannalu peqqissiartorpoq maannalu nakorsartittunut immikkoortortaqarfimmut nuunneqarnikuulluni. Napparsimasoq alla sapaatip akunnerata naanerani Dronning Ingridip napparsimavissuanut covid-19-imik tunillatsissimalluni unillatsiarpoq, kisianni ullumi angerlartinneqarpoq, taama nunatta nakorsaaneqarfia nittartakkamini allappoq.
Kisitsisit kingulliit ataani takukkit:
