Covid-19: Nuummi tunillatsittut nutaat tallimat

Nuummi septembarip aqqarnganiit tunillatsittut nutaat tallimat paasineqarput. Nunattalu sinnerani tunillatsittoqarsimanngilaq.

Illoqarfiit pingaarnersaani tunillatsissimasut nutaat tallimat paasineqarsimasut kisitsisit kingulliit Nunatta Nakorsaaneqarfianeersut takutippat.

- Nuummi tunillatsissimasut nutaat tamarmik ornittakkami Timmiaaqqami tunillaasuunermut attuumassuteqarput. Ulluni kingullerni qatanngutigiiaat angajoqqaallu meeqqerivimmiituutitaqartut tunillanneqartarput, oqartussat paasissutissiipput.

Maanna Nunatsinni tunillatseqqasut katillugit 54-iupput. Akunnerit 24-t ingerlanerini Nuummi taamaallaat tunillatsittoqarpoq nunattalu sinnerani tunillatsittoqarani.

Avannaata Kommuniani ataatsimik tunillatseqqasoqarpoq, Qeqertalimmi soqanngilaq, Qeqqata Kommuniani 15-it, Kommuneqarfik Sermersuumi 38-it Kommune Kujallermilu tunillatseqqasoqarani,

Illoqarfiit pingaarnersaani tunillaasuuneq

Nuummi meeqqerivinni ornittakkamilu tunillaasuuttoqareersorlu ornitakkat tamarmik oqartussaniit matuneqarput. Atuarfik Samuel Kleinschmidtimi atuaqatigiiaat ataatsit, Ukaliusap atuarfianilu atuaqatigiiaat pingasut angerlartinneqarnikuupput. Paaqqinnittarfiillu Timmiaaqqat, Narsarmiutaq aamma ornittagaq Illu matoqqatinneqarput.

Tunillatsissimasut nutaat pingasut ippassaq arfininngornermi Nuummi paasineqarput. Tunillatsissimasorlu alla ataaseq Maniitsumi paasineqarluni.

- Nuummi tunillatsissimasut nutaat paaqqinnittarfinni atuarfinnilu tuniluuffiusunut atassuteqarput. Nunatta Nakorsaaneqarfiata nittartakkamini arfininngornermi allappoq.

Kisitsisit kingulliit uani takukkit:

Powered by Labrador CMS