Covid-19: Nuna tamakkerlugu killilersuutit assigiit atulersinneqarput

Innuttaasut arlallit Covid-19-imik tunillatsissimasut ulluni kingullerni paasineqarput. Tunillaassuunnerup annertusinnginnissaa pillugu Naalakkersuisut killilersuutinik ullumimiit atuutsitsilerput.

Naalakkersuisut Siulittaasuata erseqqissarpaa ulloq unnuarlu kingullermi Covid-19-imik tunillatsissimasut arlallit paasineqarsimammata tuniluunnerup sukkasuumik pisinnaaneranik takutitsisoq.

Ulluni kingullerni tunillatsissimasut paasineqartut 13-iupput. Taakku sisamani inissisimapput.

Tunillatsissimasut ukunaniipput:

• Ilulissat 1
• Sisimiut 6
• Nuuk 1
• Qaqortoq 3
• Narsaq 1
• Narsarsuaq 1

- Takusinnaalereerparput tunillaassorneq timmisartumiit ataatsimiit pisoq. Pissutsit ilungersunartorujussuarmik inissisimavoq. Tunillatsissimasunut qanillivallaarsimasinnaasut innuttaasullu napparsimanermik ersiuteqartut misissugassanik maanna tigusiffigitittaarput. Taamaammat ulluni tullerni nutaanik tusarnissarput naatsorsuutigaarput, Múte B. Egede oqarpoq.

Killilersuutit ullumimiit atulissapput

Ullumi nalunaaqutaq 16.00 aallartittumik nuna tamakkerlugu killilersuutit atulissapput. Naalakkersuisut siulittaasuata Múte B. Egedep erseqqissaatigaa killilersuutit partiit siuttuinit isumaqatigiissutigineqarlutik aalajangerneqartut.

Erseqqissaatigineqarpoq killilersuutit nuna tamakkerlugu atortut.

Ullumi nal. 16.00 uku atulissapput:

• Angallannerni sumiluunniit qanermut assiaqutit atorneqassapput. Soorlu timmisartumi, sinersortaammi, bussini taxanilu.
• Arlalinnik kateriffiusinnaasuni tamani qanermut assiaqutit atorneqalissapput, soorlu pisiniarfinni.
• Bussini ilaasinnaasut killeqalissapput, issiavinni inissat kisimik atussallutik.
• Katersuussinnaanerit killeqalissapput, qatserisartoqarfiillu akuerisaasa affaannaat isersimasinnaalissallutik, soorlu pisiniarfinni.
• Neriniartarfinni imerniartarfinni allanilu pisortanut isertarfinni inuit amerlanerpaamik 20-it isersimasinnaalissapput.
• Nunatsinnut tikittut katerinnerni ilaassanngitsut inassutigineqarpoq.

Timmisartoqarfinni isersimasinnaasunut killilersuutinut ilaatinneqanngitsut, Múte B. Egede erseqqissaavoq.

Killilersuutit tallimanngorneq 16. juli ilanngullugu atuutsinneqarallarput. Múte B. Egedelli erseqqissaatigaa pissutsit ilungersunarnerulissappata killilersuutit sukaterneqarsinnaasut.

Partiit siuttui piareersimapput killilersuutinik sukanganerusunik atuutsitsilernissamut, tunillaassortoqaannassappat.

Tunillaassuuttoqapiloortoq

Nunatsinni illoqarfinni arlalinni Covid-19-imik tunillatsissimasut maanna 13-iupput.

Covid-19-imik tunillatsissimasut siulliit Københavnimiit Kangerlussuarmut 6. juli angalasimasut paasineqareerput, tassanngaanniillu tuniluunneq aallartissimasoq paasineqarluni. Timmisartorsuarmi tassani ilaasimasut maanna mattusimagallarnissamik piumasaqarfigineqarput misissorneqaqqissallutillu. Aarleqqutigineqarpoq corona Delta-mik taaguuteqartoq maanna nunatsinni tunillaassortoq.

Deltaasinnaavoq

Nakorsaaneqarfimmi nakorsaq, Paneeraq Noahsen nassuiaavoq timmisartorsuarmi Københavnimiit nunatsinnukartumi ilaasoq ataaseq angalannginnermini Danmarkimi katerisimaartuniissimasoq, tassanilu tunillatsissimanissaa ilimagineqartoq.

- Coronavirus Deltanissaa ilimagineqarsinnaavoq, taannalu tunillaatiasuararsuuvoq. Timmisartorsuarmi ilaasut allat tunillatsissimasinnaanerat naatsorsuutigisinnaavarput. Erseqqissaatigissavara tunillatsissimasut akiuussutissalertereersimasut napparsimanermut ersiuteqanngimmata, oqarpoq nangillunilu:

- Suli akiuussutissalertissimanngitsut kaammattorusuppagut akiuussutissamik kapiteqqullugit, oqarpoq.

Naalakkersuisut siulittaasuata erseqqissaatigeqqippaa tunillaassortoqannginnissaanut oqartussat maleruaqqusaat malinneqassasut. Tassa allanut qanillinaveersaarneq, eqqiluisaarneq, eqitaarinninnginnissaq, napparsimanermullu ersiuteqaraanni angerlarsimanissaq.