Coronavirus: Pingasunngornermi tusagassiortunik katersortitsisoqassaaq
Covid-19-mut killiffik pillugu tusagassiortunik Naalakkersuisut pingasunngornermi nalunaaqutaq 13.00 katersortitsissapput.
Avannaata Kommuniani aqqaneq-marluk tunillatsissimasut ullumi marlunngornermi juulip 27-ani paasineqarput. Covid-19-imik tunillatsissimasut sisamat Upernavimmiipput arfineq-pingasullu Tasiusamiillutik. Tunillatsissimasullu akiuussusersorneqarsimanngillat.
Corona pillugu killiffik pingasunngornermi nalunaaqutaq 13.00 Naalakkersuisuniit saqqummiunneqassaaq.
Nunatsinni nakorsaanerup ataasinngormat uppernarsarpaa, coronavirusi Delta tuniluutiaraasoq Nunatsinni atugaalersimasoq. Misissueqqissaarsimanerit takutippaat, Delta timmisartorsuup juulip arfernani Danmarkimiit nunatsinnukarnerani tuniluutilersimasoq.
Taamanilu Nunatsinni tunillatsittut amerlipiloorput. Siullermik kujataani tuniluuttoqarpoq, Nuummi Sisimiunilu. Upernavimmi tunillatsissimasoq siulleq sisamanngornermi juulip 22-ani paasineqarpoq. Maannalu Avannaata Kommuniani 16-inik tunillatsissimasoqarluni. Taakkunannga ullumi 12-it tunillatsissimasut paasineqarpoq. Peqqissisimasut maanna 71-iulersimapput.