Coronavirusimik tunillatsittoqarsimasinnaaneranik pasisaqartoqaqqippoq

Kalaallit Nunaanni tunillaassortunik nappaalanersuaqarneranut ataatsimiititaliarsuaq coronamik tunillatsissimasinnaasunik pingasunik Nuummi pasisaqarput

Inuit pingasut Nuummi najugaqartut angerlarsimaffimminnit aneqqusaanngillat, taakku coronavirusimik tunillatsissimanersut maanna misissorneqarsimalerpoq, misissuinerit inerneri utaqqineqarlutik.

Tallimanngorpat misissuinerit qanoq inerneqarnersut paasineqassagunarpoq, tusagassiutinut nalunaarummi nalunaarutigineqarpoq.

- Pineqartoq ataaseq Danmarkimi timmisartorsuarmut ilaalluni Kangerlussuarmut marlunngormat tikippoq. Ulloq taanna timmisartumik ilaalluni Nuummut ingerlaqqilluni, nalunaarutigineqarpoq.

Ilaasut nalunaarfigineqartut

- Timmisartorsuarmi ilaasut maanna attavigineqaleruttorput, tunillatsissimasutut pasineqartup eqqaani issiasimasut paasiniarneqarput aamma Dash-8-mut ilaaqatigisimasai assinganik attavigineqaleruttorlutik.

- Inuit allat marluk Canadami Torontomi ataatseersuarnermi peqataaqqammerput. Ataatsimeersuarnermilu tassani peqataasuni ataaseq coronavirusimik tunillatsissimasoq paasineqarpoq, ataatsimiititaliarsuaq allappoq.

Nunani coronavirusimik tunillaassuiffinniissimagaanni Kalaallit Nunaaliannginnermi ulluni 14-ni angerlarsimaannartoqarnissaa innersuussutigineqarpoq, tamanna Danmarkimi Islandimiluunniit pissasut innersuussutaavoq.

Timmisarttut pineqartut tassaapput GL781 Danmarkimiit Kangerlussuarmukartoq aamma timmisartoq GL555 Kangerlussuarmiit Nuummukartoq. Timmisartunut taakkununnga ilaasut attavigineqanngitsut 'tunillatsinnaanermut aarlerinaatikinnerusuniittut', nalunaarutigineqarpoq.

Powered by Labrador CMS