Coronavirusimik tunillatsissimasoq nutaaq paasineqartoq
Inuk alla ataaseq coronamik aamma tunillatsissimasoq paasineqarpoq. Inuk pineqartoq coronamik napparsimasumut qanigisaasuuvoq.
Inuk, coronavirusimik napparsimasumut paasineqareersumut qanigisaasuusoq, coronavirusimik tunillatsissimasoq paasineqarpoq.
Taamaasilluni Kalaallit Nunaanni tunillatsissimasut marlunngorput, tamarmik Nuummiillutik.
- Tunillatsissimasoq ippassaq pisumut attuumassuteqarpoq. Tamanna naatsorsuutigineqarsimavoq qanigisat akornanni tunillaassuuttoqartarnissaa ilimanarluinnarmat, Namminersorlutik Oqartussat tusagassiorfinnut nalunaaruteqarlutik allapput.
Inuit pineqartut ilisimatinneqareerput mattusimatinneqarlutillu, Namminersorlutik Oqartussat ilisimatitsipput.
Taakku nutaat tunillatsissimasut marluk aqunneqarsinnaanngitsumik tunillaassuutsitsilernissaat ilimagineqanngilaq. Kisianni pisortaqarfinninngaaniit peqqissutsimik suliaqartut siunnersuutaat tamanit maleruaqquneqarput.
Coronavirusimik tunillatsissimasoq siulleq Nuummi marlunngornermi unnukkut paasineqarpoq. Taanna tallimanngormat angalareerluni ullut tallimassaanni misissortinnermini paasineqarpoq coronavirusimik napparsimalersimasoq.
Oqartussat innersuussutigaat eqqiluisaarnissamut malitassat innuttaasunit malinneqassasut.
Ukuusut:
- Qanillinaveersaarit
- Assammiinaveersaarit eqitaarinaveersaarlutillu
- Assannut quersornaveersaarit
- Assatit asakulakkit
- Napparsimaguit angerlarsimaannarit ersiuteqaruillu COVID-19-eqarnerlutit misissortigit