Coronavirus: Arctic Circle Race taamaatiinnarneqarpoq
Nunani assigiinngitsuni coronavirusertoqarnera pissutaalluni Sisimiuni ujakkaarluni unammersuaarnissaraluaq taamaatiinnarneqarpoq
- Arctic Circle Race ukioq manna ingerlanneqassanngitsoq aalajangerpugut.
Arctic Circle Racemi siulersuisuni siulittaasoq Jens Klaus Lennert Sermitsiaq.AG-mut oqarpoq.
Tamanna pillugu siulersuisut ullumi ataatsimiipput, nunani assigiinngitsuni coronavirusertoqarnera pissutaalluni ujakkaarluni unammisitsinissaraluaq taamaatiinnarneqarluni.
- Nakorsaaneqarfik qanimut oqaloqatigisaqattaarparput, ullunilu kingullerni tunillatsittut amerliartupiloorlutik. Akisussaassuseqartumik iliussagutta allamik aalajangersinnaanngilagut, oqarpoq.
Peqataanissamut nalunaartut
Arctic Circle Racemut peqataaniarlutik inuit 100-t missaanniittut nalunaarsumagaluartut ilisimatitsissutigaa.
- Ukioq manna 160-nik peqataasoqassasoq naatsorsuutigisimagaluarparput, taakkunannga nunanit allanit 60-it nunanit allaneersuullutik. Nunanit assiiinngitsunit aqqanilinnit peqataasoqartussaagaluarpoq, Jens Klaus Lennert ilisimatitsivoq. Arctic Circle Racep unitsiinnarneqarneranut peqataasussaagaluit mailimik nassinneqassasut ilisimatitsissutigaa.
ACR apriilp aappanit tallimaat ilanngullugu ingerlanneqartussaagaluarpoq.