Corona: Unittut nutaat pingasut - angerlartut aamma pingasut
PCR-testit 113-it misissorneqarsimapput, taakkunannga 23-t tunillatsissimapput. Covid-19-imik tunillatsissimasut pingasut nutaat napparsimavimmut unitsinneqarsimapput. Peqqinnissaqarfinni Avannaani Disko-milu tunillatsissimasunik uninngasoqanngillat.
Covid-19-eqartut qulingiluat napparsimavinni uninngapput. Ullup ataatsip ingerlanerani Covid-19-eqarlutik unittut nutaat pingasuupput, Nuummi marluk Sisimiunilu ataaseq. Uninngasut pingasut angerlatsinneqarsimapput matusimatinneqarunnaarlutilluunniit. Angerlartinneqartut tamarmik Sisimiuni najugaqarput.
Maanna Nuummi sisamat uninngapput, Sisimiuni marluk, Nanortalimmi marluk Narsamilu ataaseq. Taamaasilluni Covid-19-eqartunik peqqinnissaqarfinni Avannaani Disko-milu uninngasoqanngillat.
- Uninngasut marluk Covid-19 pingaarnertut peqqutigalugu uninngapput (Kategori 1).
- Uninngasoq ataaseq Covid-19-imik tunillatsissimaneq allamik nappaateqarnermut sunniuteqarpoq. Kisianni nappaat alla pingaarnertut uninngassutaalluni (Kategori 2).
- Uninngasut arfinillit Covid-19 pingaarnertut nappaatiginagu uninngapput. Taakkununnga covid-19 uninnganeranut annertunerusumik sunniuteqanngilaq (Kategori 3). Nunatta nakorsaaneqarfia kisitsisit nutarterneqarnerini taama paasissutissiivoq.
Covid-19-eqarlutik uninngasut akornanni perululluni uninngasoqanngilaq.