Corona: Ukioq manna siullerpaamik tunillatsissimasumik uninngasoqanngilaq
Nuna tamakkerlugu Covid-19-imik tunillatsissimasumik uninngasoqanngilaq. Sapaatip akunnerata naanerani uninngasut katillugit sisamat angerlartinneqarput. Taamaalilluni ukioq manna siullerpaamik coronamik tunillatsissimasumik napparsimavimmi uninngasoqanngilaq. Tamanna nunatta nakorsaaneqarfianiit paasissutissiissutigineqarpoq.
Peqqinnissaqarfik tallimanngonermi, arfininngornermi sapaamilu PCR-testinik 65-inik tigusaqarpoq. Taakkunannga 16-it tunillatsissimapput.
Tallimanngormalli martsip 11-anili nutaanik unittoqanngilaq. Sapaatip akunnerata naanerani uninngasut katillugit sisamat angerlartinneqarput. Nuummi marluk, Nanortalimmi ataaseq, Uummannamilu ataaseq. Uninngasimasut tamarmik Covid-19 pissutigalugu uninnganngillat imaluunniit covid-19 pissutaanerulluni unitsinneqarsimanngillat.
- Ullumi ataasinngornermi martsip 14-ani nalunaaqutaq 16.00 ukioq manna siullerpaamik napparsimavinni Covid-19-eqartunik uninngasoqanngilaq. Taama nunatta nakorsaaneqarfia nittartakkamini paasissutissiivoq.
Sisamanngornermi aamma nutaanik unittoqarsimanngilaq, tassanilu uninngasut katillugit tallimat angerlartinneqarsimapput.
