Corona: Savalimmiuni inuit 900-t mattussimatinneqartut

Savalimmiuni inuit coronamik tunillatsissimasut amerleriarujussuarsimammata, inuit 900-t mattussimatinneqalersimapput. - Ajunngitsup tungaanut ingerlasoqarpoq, ulorianartorli suli qaangiutinngilaq, nunami nakorsaaneq oqarpoq.

Napparsimmaveqarfiup kisitsisaataa kingulliit aggustip qulingiluaaneersut takutippaat, Savalimmiuni Covid-19-imik tunillatsissimasut arfineq marlunnik ilaqqissimasut.

Tunillatsissimasut amerlassusaat ulluni kingullerni ikiliartulersimaasutut isikkoraluarpoq. Aggustilli arfernani nunami nakorsaanerup ilisimatitsissutigaa, inuit 38-t tunillatsissimasut paasineqarsimasoq, tassa ullormi ataatsimi tunillatsissimasut aatsaat taamak amerlatigisut.

Misissuisarneq tatineqartoq

Sapaatip akunnera ataaseq kingumut qiviaraanni, Savalimmiuni juulip 28-ani 29-anilu Olajfestertoqarmat inuit tunillatsissimasut amerlisimapput. Inuit ikinnerpaamik 88-it tunillatsissimapput, kisitsisillu nutartikkat kingulliit aggustip qulingiluaaneersuupput. Maannakkorpiaq ullormiit ullormut kisitsisit nutarterneqarneq ajorput, tassa misissuisarnerit tatineqarsimanerat pissutigalugu. Misissortittut amerlammata oqartussat misissugassatut tigusanik tamanik misissueqqissaarnissamut kinguaattooqqapput.

Nunamili nakorsaaneq neriuuteqarpoq, tunillatsissimasut ikiliartulersimasutut isikkoqarmata.

- Nunami sumiiffiit ilaanni tuniluuttoqartoq takusinnaavartput, peqatigitilluguli tunillatsittartut ikiliartorput, tamannalu nuannaarutigaarput. Kisitsisit aamma takutippaat, savalimmiormiut tuniluuttoqarneranik pimoorussisut, nunami nakorsaaneq Lars Fodgaard Møller oqarpoq.

Qanermut assiaquteqartoqassasoq

Nunami nakorsaanerup coronavirusip tuniluutiasuunera mianersoqqussutigaa. Ajornanngitsuaqqamik tuniluuttarpoq, taamalu ulorianartumik tuniluutipallalersinnaalluni. Suliffeqarfippassuit sulisutik misissortissimavaat, nappaallu napparsimmavinni meeqqerivinnilu atuuttoq paasinarsisimavoq.

Oqartussanilli maluginiarneqarsimavoq, inuit napparsimalersimasut ilungersunartumik nappaataat ersiutissartaqanngitsut.

Pisortalli suliffeqarfiutaanni siusinnerusukkut taamatut tuniluuttoqarsimanngilaq, oqartussallu tuniluunnerit tamaasa aqussinnaanngilaat. Lars Fodgaard Møllerip oqaatigaa, inuit katersuunneranni immikkut mianersortoqartariaqartoq, inuppassuimmi nuannisaqatigiinneranni assigusumillu pisoqarnerani tuniluunneq siaruaatilersarmat.

Nunani allani inassuteqaatit assigalugit, qanermut assiaqutit immikkut illersuutitut atorneqartarnissaat inassutigineqarpoq.

- Pissutsit maanna taamaatillugit, isumaqarpunga silamiikkaangatta inuppassuillu akornanniikkaangatta qanermut assiaqummik atuisariaqartugut, Lars Fodgaard Møller oqarpoq.

Norgep Savalimmiut tikeqqusaanngitsutut allattorsimaffimmiut ilanngukkaa

Pisortat kisitsisaataanni takuneqarsinnaavoq, Savalimmiuni inuit 88-it coronamik tunillatsissimasut, 900-nillu amerlanerusut mattussimatinneqartut. Peqqinnissaqarfik malinnaasinnaanngilaq, akissutissallu sukkanerusumik tunniussinnaanagit, naammattunik sulisussaqannginneq pissutigalugu. Tallimanngornerinnarmi aggustip arfineq-aappaani inuit 4541-t misissortissimapput. Ataasinngornermi ullup-qeqqata siorna misissortinniarlutik utaqqisut 1648-usimapput.

Peqqinnissatigut oqartussat taamaammat laboratooria Thetis qinnuigisimavaat misissugassatut tigusanik misissueqqissaarnissamut ikiuuteqqullugu. Savalimmiuni martsip qaammataanili inuit 57.863-it misissorneqarsimapput. Tassa Savalimmiormioq ataaseq ataasiaannarani misissortittarsimalluni.

Sapaatip akunnerani kingullermi tuniluunneq siaruaatilermat Norgep Savalimmiut tikeqqusaanngitsutut allattorsimaffimminut ilanngussimavaa, Savalimmiunullu angalaqqusiunnaarluni. Norgemi peqqinnissatigut oqartussat piumasaqaatigaat, nunani nunallu immikkoortuini innuttaasut 100.000-iugaangata inuit 20-t inorlugit tunillatsissimasassasut. Savalimmiuni tunillatsissimasut 205,4-put.

Powered by Labrador CMS