Corona: Piumasaqaatit malitassallu amerlanerit piareersarneqarput
Peqqissutsimut Naalakkersuisoq, Anna Wangenheim juullip nalaani killilersuutinik piumasaqaatinillu suliaqartoqalernera nalunaarutigaa. Ilanngullugu ilisimatitsissutigineqarpoq Air Greenlandimi Takuss-billetit akeqanngitsumik allanngortinneqarsinnaalersut.
Naalakkersuisut nalunaarummik nutaamik suliaqarput, juullip ukiortaallu akornanni nunatsinnut tikittunut piumasaqaateqarnerunissaq pillugu.
Peqqissutsimut naalakkersuisoq, Anna Wangenheim tallimanngornermi 13. november tusagassiortunik katersortitsinermi ilisimatitsivoq.
- Nunatsinnut angalanissamullu piumasaqaatit ilanissaat sulissutigileruttorparput, juullip nalaani nunatsinnut tikittussat eqqarsaatigalugit, Anna Wangenheim oqarpoq ilisimatitsillunilu nalunaarut sapaatip akunnerata tulliani saqqummiunneqarumaartoq.
- Oqarsinnaavunga qanermut assiaquteqartarneq, taanna piareersimaffigissavarput juullikkut nalaani annertunerusumik takusalernissaa, oqarpoq.
Billetit allanngortinneqarsinnaalerput
Nunatsinnut angalasut sapaatip akunneranut maanna 400-t ataatilaartarpai. Juullilli ukiortaallu nalaani angalasut amerlanerujussuunissaat oqartussanit takuneqarsinnaalereerpoq.
Anna Wangenheim ilisimatitsivoq timmisartumut Takuss-billetit akeqanngitsumik allanngortinneqarsinnaalersut.
- Maanna siumoortumik nalunaaruteqarpugut, innuttaasut namminneq eqqarsaatersorsinnaaniassammata, ilumut angalanissamut piffissaanersoq massakkut, oqarpoq.
Ilanngullugulu nassuiaatigaa Naalakkersuisut tungaanniit pisariaqartillugu killilersuutinik allanik atuutsitsilernissamut nalilersuinissaq pisussaaffigineqartoq, atuutsinneqalersinnaasorlu.
Tunillatseratarsinnaaneq annertooq
Nakorsaaneq Henrik L. Hansen oqaluttuarpoq oqartussat nalilersuisut qanoq iliuusissat pillugit nunatsinnut angalasut amerlavallaalinnginnissaat anguniarlugu. Pingaartumik juullip ukiortaallu nalaanni.
- Tunillatsissimasunut tunngatillugu sulinerput maannamut iluatsilluarpoq. Ilaatigut aamma iluatsitsilluarsimavugut. Arlallilli ataatsikkut tunillatsissimassappata uagutsinnut ilungersunartuussaaq. Taamaattoqassappat, Kalaallit Nunaanni nappaalanersuaqalernissaa aarlerinartorujussuanngussaaq. Henrik L. Hansen oqarpoq.
Politimester Bjørn Tegner Bayip tikinnermit angerlarsimaannarallarnissamut peqqussutip malinnissaata pingaaruteqassusia oqaatigaa. Tunillatsissimasut marluk kingulliit, tamarmik Aasianneersut, assersuutitut oqaluttuarai.
- Tunillatsissimasoq siullermi sulisut arlallit ullorpassuit atorlugit tunillatseratarsimasinnaasut ujartariaqarsimavaat. Sulisut sulianik allanik suliaqarsimasinnaagaluartut.
- Tunillatsittoq kingulleq angerlarsimaannarnissamik malinnissimavoq, taamaammat suliaq akunnialuinnarnik atuiffigaarput, politimester Bjørn Tegner Bay oqarpoq.