Coronapassi qanoq sivisutigisumik atuutissava?

Savalimmiuni coronapassi atorunnaarneqartoq, Spaniamilu coronamut isiginninneq allanngorluni, virusip nualluutitut tuniluunneratut isigineqalernerani, nunami maani coronapassi suli atorneqartussaavoq.

Pingajussaanik akiuussutissalerneqarsimaneq nalunaarsoruminaatsinneqartoq

Pingajussaanik akiuussutissalerneqarsimanerit Coronapassimut ilanngunneqarsimanngippat, Sullissivik.gl saaffigissavat, Coronapassillu nutarteqqullugu. Taamaaliorsinnaavutit Uani

Peqqissutsimut Naalakkersuisoqarfimmi sulisup Coronapassit nutartissavaa.

Danmarkimi Coronapassit atorunnaarsimappat, app atorlugu EU-Coronapassimut allanngortissinnaavat. EU-Coronapassimi ingerlaannartumik atorunnaarneq ajorpoq. Aamma app-imi nammineq quppernermut nuussinnaavutit, tassani akiuussutissalerneqarsimanitit allassimapput. Kalaallit Nunaanni piumasaqaataavoq, assersuutigalugu neriniartarfimmut cafeenulluunniit iserniaraanni marloriarluni akiuussutissalerneqarsimanissaq

Pissarsiffik: Namminersorlutik Oqartussat

Danmarkimili EU-milu aamma maani nunami malittarisassat assigiinngitsorpassuummata, coronapassip qanoq sivisutigisumik atuutsinneqarnera aamma passimik qanoq pissarsisoqarsinnaanera paasiuminaassinnaapput.

Nunami maani marloriarluni akiuussutissalerneqarsimagaanni coronapassi pisortatigoortumik atorunnaarsinneqarneq ajorpoq. Angalaniaraannili Dnmarkimi EU-milu malittarisassat eqqumaffigineqartariaqarput.

Danmarkimi sapaatip-akunnerni matumani aalajangiunneqarapoq, aappassaanik akiuussutissalerneqarsimagaanni passi qaammatini tallimani atuuttassasoq.

EU-mi aappassaanik akiuussutissalerneqarnerup imaluunniit EU-p iluani angalanermut atatillugu siullermik akiuussutissalerneqarsimanerup (akiuussutissaq Johnson & Johnsonimeersoq pineqarpat) kingornatigut qaammatini qulingiluani passi atuutsinneqartarpoq.

Tunillatsissimagaanni aamma EU-p digitalikkut covidcertifikatia, tunillatsereernermi ulluni 180-ini siullerni atorneqarsinnaavoq. Ullut 180-it taakku tunillatsissimalluni paasitinneqarnermit ullut aqqanillit qaangiunnerannit kisinneqassapput. Certifikati nunamit misissuiffiusimasumit tunniunneqartarpoq. EU-mi malittarisassat paasisaqarfiginerukkit Johnson & Johnsons UANI

Tunillatsereernermi

Nunami maani tunillatsereersimagaanni coronapassi sapaatip-akunnerini aqqaneq-marlunni atuuttarpoq. Tunillatsissimanerli coronapassimi nalunaarsorsimatinneqarniarnera suli ajornartorsiutigineqarpoq.

Kalaallimmi Nunaanni coronamut misissuinermi tunillatsittoqarsimanera passimi nalunaarsorneqarneq ajorpoq. Maannalu ersiutillit tamarmik PCR atorlugu misissorneqartarunnaarput, angerlarsimaffimmilu imminut misissorsimaneq coronapassimi uppernarsaatigut atuutsinneqarani.

Peqqissutsimut Naalakkersuisoqarfiup Sermitsiaq.AG-mut ilisimatitsissutigaa, malittarisassat pissutsinut nutaanut naleqqussarniarlugit sulisoqartoq.

It ajornartorsiutigineqartoq

Inuppassuit siullermik akiuussutissalerneqarsimanerat coronapassimut app-imi ingerlaannartumik nalunaarsorneqarsimavoq. Pingajussaanilli akiuussutissalerneqarsimaneq coronapassimut nalunaarsorniarneqarnera maannakkorpiaq ajornartorsiutigineqarpoq. Oqartussat taamaammat kaammattuutigaat, pingajussaanik akiuussutissalerneqarsimasut passiminnik misissuissasut.

- IT-kukkut ajornartorsiuteqartoqarnerata Kalaallit Nunaanni pingajussaanik akiuussutissaliisimanerit Danmarkimi Europamilu Coronapassimut ilanngutsinniarnerat akornuteqartippaa. Coronapassi Kalaallit Nunaanni maanna malittarisassat malillugit atorunnaartussaanngikkaluartoq, innuttaasunut nunanut allanut aallarniartunut imaluunniit Danmarkimi coronapassertik Kalaallit Nunaanni akiuussutissalerneqarsimanermi uppernarsaatitut atussallugu ajornartorsiutigineqartarpoq.