Coronap tuniluunnera pillugu tusagassiortunik katersortitsisoqassasoq
Peqqissutsimut Naalakkersuisoq nunatsinnilu nakorsaaneq pingasunngornermi ataatsimut tusagassiortunik katersortitsissapput.
Namminersorlutik Oqartussat tusagassiorfinnut nalunaarutaat naatsoq naapertorlugu, ullumi tusagassiortunik katersortitsisoqarnerani tuniluuttoqarnerata killiffia saqqummiunneqassaaq.
Peqqissutsimut Naalakkersuisoq Kirsten L. Fencker Nunattalu Nakorsaanera Henrik L. Hansen tusagassiortunik katersortitsissapput.
Oqartussat marlunngormat unnukkut coronap tuniluunnera pillugu nutaarsiassiipput, tassa Namminersorlutik Oqartussanit ilisimatitsissutigineqarpoq, Sisimiuni tunillatsissimasut nutaat sisamat kimik tunillanneqarsimanersut ilisimaneqanngitsoq, taamaammallu illoqarfimmi ilisimaneqanngitsunik tunillatsissimasoqarsinnaasoq.
Sermitsiaq.AG soorunami tusagassiortut katersortinneqarpata peqataassaaq.