Coronap tunillaassuunnera annikilliartortoq

Nunatsinni illoqarfiit tamarmik nunaqarfiillu tamangajammik coronavirusimik tunillaassuuffiusimanissaat oqartussat nalilerpaat. Tunillaassuunneq novemberimi aallartippoq, juullillu ukiortaallu kingorna tunillaassuunneq annertusingaatsiarluni. Oqartussalli maanna naliliipput tunillaassuunneq annikilliartortoq.

- Nunatsinni illoqarfinni tamani tunillaassuunneq annikilliartortutut nalilerneqarpoq - sumiiffiit ilaanni tunillaassuuttoqarunnaarpoq, sumiiffinnili allani tunillaassuunneq sukkut tamaana taamaallaat malunnaateqarluni, nunatsinni nakorsaaneqarfik allappoq.

- Malunnaatilimmik tunillaassuuffiusut tassatuaalerput Qeqqani Maniitsoq aamma Sisimiut. Sisimiut peqqinnissaqarfiani napparsimallutik nalunaartartut ataasiakkaaginnaapput, atuarfinnilu atuartut tunillatsissimasut maanna peqqissisimalerlutik. Angerlarsimaffimmi misissuutinik aallertartut aamma ikiliartorput, allaatigineqarpoq.

Ikinnerusut unittarput

Nunatta nakorsaaneqarfia allappoq inuiaqatigiit ingerlasinnaanerannut sunniuteqartartut maanna nalinginnaasumik ingerlalereersimasut.

Covid-19-imik tunillatsissimasut napparsimmavimmut unittartut aamma ikileriarput. Tallimanngornermi kingullermik nalunaaruteqartoqarneraniilli ullumikkumut marluk uninngajunnaarsimapput, marlulli allat unitsitaasimallutik.

- Tallimanngorneq 4. marts nalunaarusiortoqareerneraniit Covid-19-imik tunillatsissimasut marluk, ataaseq Nuummi ataaserlu Ilulissani, napparsimmavimmut unitsinneqarsimapput. Marlulli allat, Nuummi ataaseq Maniitsumilu ataaseq, uninngajunnaarsimallutik.

Uninngasut maanna sisamaapput, sumiiffinni Nuummi, Sisimiuni, Nanortalimmi aamma Ilulissani ataatsimik tamarmik uninngasoqarlutik.

Covid-19 pissutigalugu uninngasut marluupput. Marlulli allat allamik peqquteqarlutik uninngapput, covid-19-imilli tunillatsissimallutik.