Coronap nalaani imminut ungasinnissaq iluaqutaanngilaq: Kinguaassiuutitigut nappaatit tunillaassuupput
Martsip qaammataani, coronavirusip nunatsinni nappaatigineqarneranik paasisaqaqqaarfiup qaammataani, Sisimiuni gonorrémik nappaateqartut 36-it aamma chlamydiamik nappaateqartut 32-it nassaarineqarput. Qitiusumi napparsimmaveqarfimmi nakorsap innuttaasut akisussaassuseqaqqullugit kaammattorpai.
Inuit ilaat atoqateqassatillutik puigugaqartarput. Usuup puua.
Illoqarfimmi ataatsimi, qaammatip ataatsip ingerlanerinnaani, gonorrémik nappaateqartut 36-it aamma chlamydiamik nappaateqartut 32-it nassaarineqarput.
Kisitsisilli taakku illoqarfinnit allanit allaanerungaartutut isigineqarpasinngillat. Sisimiuni Qitiusumik napparsimmaveqarfimmi nakorsaq, Jan Olsen, nappaatit tunillaassuukkunnaarnissaat anguniarlugu innuttaasut akisussaassuseqaqqullugit kaammattorpai.
Kalaallit Nunaanni kinguaassiutitigut nappaatit suli annertuumik ajornartorsiutaapput, tassanilu aamma Sisimiut...
Slået op af Peqqinnissaqarfik Qeqqa / Regionssygehuset Sisimiut i Mandag den 6. juli 2020
- Kalaallit Nunaanni kinguaassiutitigut nappaatit suli annertuumik ajornartorsiutaapput, tassanilu aamma Sisimiut pineqarpoq, Jan Olsenip Facebookimi allatani aallarnerlugu allappoq.
- Assersuutigalugu Sisimiuni ukioq manna martsimi inuit 36 paasineqarsimapput gonorre-mik nappaateqalersimasut aammalu inuit 32 klamydia-mik nappaateqalersimasut, tunillatsissimasulli suli amerlanerupput, nangilluni allappoq.
Mianersoqqusineq siulleq
Sisimiuni Qitiusumik Napparsimmaveqarfiup innuttaasut usuup puuanik atortaqqullugit siullermeerluni kaammattulinngilai. Napparsimmaveqarfik aprilimi ilisimatitsivoq, kinguaassiuutitigut nappaat gonorré 2015-imi kingullermik nappaatigineqangaatsiarsimasoq, aatsaat taama takussaaqqilertigisoq.
Nakorsaaneqarfiup kinguaassiuutitigut nappaatit pillugit allakkiaani 2018-imeersumi allassimavoq kinguaassiuutitigut nappaat gonorré 2014-imiit 2015-imiillu innutaasut 1000-iugaangata tunillatsissimasut amerlanerpaasimasut. Kisitsit maanna appariarsimagaluartoq, gonorré annertuumik suli atugaasoq allaatigineqarpoq.
Kinguaassiuutitigut nappaateqartut Sisimiuni amerliartornerat septemberimi 2019-imi maluginiarneqalerpoq. Sulilu amerliartornissaat naatsorsuutigineqartariaqarluni.
- Tunillatsittartut suli amerlasarnerisa takutippaat inuit amerlasuut suli illersuuteqaratik atoqatigiittarnerat ingerlaannarsimasoq. Klamydia Gonorre-lu suli antibiotikamik nakorsaat bakterissanik toqoraasartoq nakorsarneqarsinnaapput, kisianni piffissami sivisuumi antibiotikamik annertuumik atuisarnerup kingunerisinnaavaa akiuussutissap tungaatigut ajornartorsiulerneq, aammalu nappaatit nakorsarneqarnissaa ajornakusoortilersinnaallugu, Jan Olsen allappoq.
Inuusuttut akornanni HIV
Qitiusumik napparsimmaveqarfiup Sisimiuni Ilulissanilu inuusuttut akornanni HIV-mik tunillaassortoqarnera paasivaa.
HIV-mik tunillatsissimasut inuunermik sinnerani nakorsaatitortussaapput, taamatulli nalinginnaasumik inuuneqarsinnaallutik. Nakorsarli naapertorlugu HIV-mik tunillatsissimasut ilaat nakorsaatitornissaminnik attassisinnaasimanngillat.
- Paasissutissiilluartarneq ingerlanneqaraluartoq, ilisimavarput illoqarfitsinni HIV-mik tunillatsissimasunik peqartartoq, nakorsaatit atoqquneqarnerisut atorneqarnatik illersuuteqarnatillu atoqateqartartut, atoqatigisaq paasiteqqaarnagu HIV-mik nappaateqarluni, nakorsaq allappoq.
Kinguaassiuutitigut nappaatit tunillaassorunnaarnissaat anguniarlugu nakorsap allatani naggaserlugu siunnersuutinik pingasunik ilanngussivoq.
Kinguaassiutitigut nappaatinissimaguit:
- Peqqissaaviup kajumissaarinera naapertorlugu nakorsaatit ingerlatikkit
- Atoqatigisimasatit attavigikkit imaluunniit venerea attavigiuk
- Akisussaaffik tigujuk! Kinguaassiutitigut nappaatinik tunillaassuineq unitsiguk.