Coronap kingorna: Katuap inersuani tusarnaartitsinissaq taamaatinneqarpoq
Katuap inersuani Kimmernaq Kjeldsenip tallimanngorpat tusarnaartitsinissaralua, killilersuutaasussat pillugit apeqqutit arlallit akineqarsimanngimmata taamaatitsiinnarpoq.
Kulturip Illorsuata Katuap inersuarmi tusarnaartitsinissaq ukioq manna siulliusoq, corona pillugu killilersuutit pillugit corona pillugu allattoqarfimmit ersarissumik akissutisisinnaannginnertik tunngivalugu taamaatiinnarpaa.
Nuummi maanna arfinilinnik tunillatsissimasoqarpoq. Taakku sapaatip akunnerata siuliani nassaarineqarput, taakkunanngalu marluk tikinnerup kingorna ullut tallimassaanni misissorteqqinnerminni tunillatsissimasut paasineqarsimallutik.
Tunillaassuuttoqarnera nalilersorneqareerluni oqartussanit qulakkeerneqarpoq aqunneqanngitsumik tunillaassuuttoqanngitsoq. Killilersuutilli pissutigalugit Katuap inersuani Kimmernaq Kjeldsenip ukiunik 15-inngortorsiorluni tusarnaartitsinissaq Katuap maanna taamaatippaa.
Katuaq Facebookimini taama nalunaarpoq.
- Amerlaqaagut qilanaarsimaqisut, kisianni paarlersuarmi tusarnaartitsineq tulleq suli utaqqilaartariaqarparput, Katuaq ilisimatitsivoq.
Nammineq aalajangerput
Katuami pisortaq, Arnakkuluk Jo Kleist nassuiaavoq killilersuutinnut tunngatillugu apeqqutit arlallit suli akissutissarsineqarsimanngitsut. Taamaattumik tusarnaartitsinissaq maanna taamaatinneqarpoq.
- Corona pillugu allattoqarfik attaveqarfigiuarsimavarput. Tusarnaartitsinissamulli tunngatillugu killilersuutaasussat pillugit apeqqutit arlallit suli akineqanngimmata, tusarnaartitsinissaq taamaatittariaqarsimavarput. Uggornaraluarpoq, maannakkulli allatut iliorsinnaanngilagut, Katuami pisortaq Arnakkuluk Jo Kleist oqarpoq.
Oqartussat sunik nalilersuissanersut pillugit itisiliisinnaanani oqarpoq.
Katuap inersuani kingullermik tusarnaartitsisoqarpoq februar 2020. Tulliani qaqugu tusarnaartitsisoqassanersoq pillugu suli ulluliisoqanngilaq.
Nittartagaq aqqutigalugu tusarnaariarnissamut bilitsisisimasut akiliutaat utertiortorneqalereerput. Bilitsilli Katuap saaffiginnittarfiani pisiarineqarsimappata, nammineq ornigulluni aningaasat utertinneqarsinnaassapput.
Katuamut coronavirusip ajornartoortitsinera ilungersunarsimavoq. Kultorip illorsuanut 2020 2,3 milliuunit koruuninik amigartoorfiuvoq.