Coronap ajornartorsiutaanera altanit nutarterneqarnerannik nassataqartoq
Illoqarfinni arlalinni altaninik nutarterinissat pinnguartarfiliornissarlu kingusinaartupilussuaq, corona ajornartorsiortitsigaluartoq sanasunut suliaqartitsissapput.
Sanaartugassat milliadip affai sinnerlugit nalillit Naalakkersuisunit taammaatiinnarneqarnissaat kinguartinneqarnissaalluunniit kissaatigineqarpoq. Naalakkersuisulli aamma qinnutigisimavaat, sanaartugassat mikinerit arlallit piaarnerpaamik aallartinneqassasut.
Naalakkersuisut Inatsisartut Aningaasaqarnermut Akileraartarnermullu Ataatsimiititaliamut inassuteqaamminni, suliniutinut mikinernut arlalinnut aningaasanik atuisoqarnissaanik akuereqqusimapput.
62,9 millioner koruunit Qaqortumi, Paamiuni, Maniitsumi Sisimiunilu altanit nutarterneqarnissaannut atorneqassapput.
Tamatuma saniatigut 1,2 millioner koruunit Nuussuarmi (UPV) atuarfiup pinnguartarfissaanik sanaartornissaut atorneqassallutik.
Aningaasarlionermi suliniutit pingaarutillit
Naalakkersuisut isumaqarput, suliassat suliassaqartitsiniarnermut pitsaasumik sunniuteqassasut, aamma maanna coronap ajornartorsiortitsinerani aningaasaqarnerup kinguariarnerani tamanna pingaaruteqassasoq.
Suliniutit Naalakkersuisut aningaasaqarnermik misissuinerisa ilaattut isigineqassapput.
Illoqarfinni arlalini altaninik nutarterineq aamma ajornartorsiummut pinasuartumik iluarsineqartussumut aaqqiissutaassaaq. Illoqarfinni pineqartuni inissiarsuit arlallit altaniisa betorngitaat annertuunik ajoquteqarput, najugaqartunut pisuinnarnullu annertuumik ajoqusiisinnaasunik.
Naalakkersusiut ilisimatitsissutigaat suliarinnittussarsiuussisoqarsimasoq, sulinerlu aasamut aallartinneqassasoq, naatsorsuutigineqarluni 2021-mi naammassineqarsimassasut.
Pinnguartarfissaq ukiuni qulini kinguaattooqqasoq
Nuussuarmi Upernaviup eqqaaniittumi atuarfiup pinnguartarfissaanut tunngatillugu Naalakkersuisut ilisimatitsipput, ukiut qulit matuma siornatigut atuarfiup allilerneqarnissaanut allanngortinneqarnissaanullu Naalakkersuisut sanaartortitsiniarsimasut.
Maanna ukiut qulit qaangiuttut Avannaata Kommunianit erseqqissaatigineqarpoq, sanaartornissamut akuersissummi pinnguartarfiliornissaq piumasaqaataasoq.
Piumasaqaat taanna taamanikkut naammassineqarsimanngilaq, Naalakkersuisulli tamatuma maanna naammassineqarnissaa isumaginiarpaat.
- Pinnguartarfeqarneq nunaqarfimmi meeqqat inuusuttullu pinnguarnerminni pitsaanerusumik atugassaqartinneqalernerisa saniatigut, najukkami suliassaqartitsissaaq, suliniummut tunngavilersuutigineqarpoq.