Coronap ajornartoortitsinera kommunit aningaasaqarnerannut annerusumik sunniuteqanngilaq
Nunatsinni kommunit tamarmik ukiuni tulliuttuni sisamani oqimaaqatigiissumik imaluunniit sinneqartoornissamik siunnerfeqarput. Kommunit ingerlarsornerat ima annertutigaaq allaat Qeqqata Kommuniani ukioq manna amigartooruteqarnissaq annilaanngatigineqarani, kommunit sinneri mianersortumik missingersuusiortut
Naak massa coronap ajornartoortitsinera aammalu coronap ajornartoortitsinerata kingunerisaanik akiligassarsuit tunuatungaani suli aarlerinartorsiortitsiunnaanngikkaluartut, kommunit aningaasaqarnikkut patajaatsumik inissisimanerannik uppisitsisinnaarpasinngilaq. Tassami nunatsinni kommunit tallimaasut tamarmik nalunaarput missingersuutit oqimaaqatigiissut imaluunniit sinneqartoorfiusut tunngavigalugit sulineq ingerlassasoq, Sermitsiaq allappoq.
Kommunillu aningaasaqarnerat patajaatsumik inissisimasimammat arlaannaataluunniit akileraarutip qaffanneqarnissaa pisariaqartissimanngilaa.
Taamatulli inerniliiginnartoqarsinnaanngilaq, tassa kommunit aningaasaqarnikkut ilungersulersinnaanerat sillimaffighineqarpoq, tamanna ersersinneqarpoq ilaatigut missingersuutini maluginiaqquneqarmat aningaasartuutinut nalimmassaatit ilanngunneqartannginnerat, aammalu kommunit eqqumaffigaat naalagaaffiup tapiissutaani akit qaffakkiartornerannut naligiissaarut 0,8 procentimik annertussusilik kommunit pissarsissutigineq ajoraat:
Aningaasaqarneq arriitsumik mangiarneqartoq
– Ingerlatsinermut aningaasartuutinut aningaasaliissutaariinngitsumik aningaasartuutit qaffakkiartornerat ingerlavoq. Akit qaffakkiartornerannut nalimmassaasoqannginera ukiunut missingersuusiorfiusunut nuunneqartarput, tamannalu isumaqarpoq kommunit aningaasaqarnikkut inissisimanerat arriitsumik mangiarneqartoq, Qeqqata Kommuniata ukioq mannamut missingersuutaani tamanna atuarneqarsinnaavoq.
Allali mianersorfissaq pillugu eqqumaffigisassaq ersersinneqassaaq kommunit 2020-mut naatsorsuutai saqqummerpata; kommunit tamarmiunngikkunik amerlanerit sinneqartuussasut naatsorsuutigereerneqarsinnaavoq. Imaanngilarli aningaasaliussanik aqutsilluarnerinnarmik pissutilimmik taamaallaat sinneqartoortoqassasoq, tassami kommunit amerlanerit sanaartornissamut pilersaarutai ataatsimut isigalugu annertuumik kinguaattooqqammata. Tassalu kommunit sanaatornermut missingersuutigisatik aammalu pilersaarutigisatik naapertorlugit ingerlasinnaajunnaaqqanerat kommunini iliuuseqarnissamik pisariaqartitsisitsipput.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: