Ullup ataatsip ingerlanerani PCR-testit 39-it misissorneqarput, taakkunannga 26 procentit tunillatsissimapput. Inuiaqatigiinni atorfiit pingaarutillit nalinginnarmik ingerlaqqilertut, nunatta nakorsaaneqarfiata nalunaarutigaa. Namminersorlutik Oqartussat suliffeqarfiutaani aamma napparsimasut sukkasuumik ikiliartorput. 

Peqqinnissaqarfik Sermersuumi Avannaanilu tuniluunneq annikilliartorpoq, Upernavimmilu suli tuniluuttoqarpoq. Taakkua Delta-varientip tuniluunnerani ukioq kingulleq eqqugaasimapput, taamaammat Omikronip tuniluusinnaanera killeqarsimagaluarluni. 

Peqqinnissaqarfinni Kujataani, Qeqqani Diskomilu suli Covid-19 tuniluuppoq.

- Nanortalimmi annertuumik suli tuniluuttoqarpoq, Narsamilu tuniluunneq annikilliartorluni. Peqqinnissaqarfik Qeqqani tuniluunneq aamma suli annertuvoq. Tassani Maniitsumi Kangaatsiamilu suli tuniluuttoqarpoq. Qasigiannguani tuniluunneq annertuvoq, Qeqertarsuarmilu Covid-19-ip tuniluunnera killeqarluni. Nunatsinni nunaqarfinni amerlanerpaani tuniluuttoqarsimanissaa aamma qularnarunnaarnikuuvoq, nunatta nakorsaaneqarfia nittartakkamini paasissutissiivoq. 

Unittut nutaat marluk

Ullup ataatsip ingerlanerani Covid-19-eqarlutik unittut nutaat marluupput. Nuummi ataaseq Maniitsumilu ataaseq. Uninngasut katillugit pingasut angerlartinneqarput, Sisimiuni marluk Nuummilu ataaseq- 

Nuna tamakkerlugu maanna Covid-19-eqarlutik uninngasut katillugit arfineq-pingasuupput. Nuummi sisamat, Nanortalimmi marluk, Narsami ataaseq Maniitsumilu ataaseq. Peqqinnissaqarfinni Avannaani Diskomilu uninngasoqanngilaq. 

- Uninngasut marluk Covid-19 pingaanertut uninngassutigaat (Kategori 1). 

- Uninngasoq marluk Covid-19-imik tunillatsissimaneq allamik nappaateqarnermut sunniuteqarpoq. Kisianni nappaat alla pingaarnertut uninngassutaalluni (Kategori 2).

- Uninngasut sisamat Covid-19 pingaarnertut nappaatiginagu uninngapput. Taakkununnga covid-19 uninnganeranut annertunerusumik sunniuteqanngilaq (Kategori 3). Nunatta nakorsaaneqarfia kisitsisit nutarterneqarnerini taama paasissutissiivoq.