Corona: Narsami inuk ataaseq tunillatsissimasoq paasineqartoq

Inuk ataaseq Danmarkimiit Narsamut tikissimasoq covid-19-imik tunillatsissimasoq nassaarineqarpoq. Pineqartoq marlunngorneq ulloq 23. februaari nunatsinnut tikissimavoq. Namminersorlutik Oqartussat tusagassiorfinnut nalunaaruteqarnerminni ilisimatitsipput.

Pineqartup mattusimasussaanermut malittarisassat malissimavai, coronamut atatillugu sulisoqatigiit Sermitsiaq.AG-mut ilisimatitsipput.

Pineqartoq Kalaallit Peqqissartut angerlarsimaffianniissimavoq.

Nunatsinni Nakorsaaneqarfiup Narsami innuttaasut tamaasa qinnuigai, malittarisassanik tamanik malinninnissamut immikkut eqqumaffiginneqqullugit, piffissami aggersumi tuniluuttoqalersinnaanera killilersimaarniarlugu.

Nunami maani kingullermik tunillatsisimasumik paasinnittoqarpoq, Uummannami januaarip 14-iani.

Attaveqarfigisimasaanik misissuisoqartoq

Angalanerup nalaani Narsamilu attaveqarfigisimasat misissuiffigineqaleruttorput. Nunatta nakorsaanerata Politiit suleqatigalugit tunillatsissimasup angalanermini attaveqarfigisimasai misissorpai.

Coronap allattoqarfiani suleqataasut ullup ingerlanerani angerlarsimaannaqqusaasutut attuumassuteqartut tamaasa attavigissavaat angerlarsimaannaqqusaanerullu sivisussusaanik misissortinnissamullu periarfissanik ilisimatitsissutigineqassallutik, Namminersorlutik Oqartussat ilisimatitsipput.

Nunatta Nakorsaaneqarfiata Kalaallit Peqqissartut Illuaniinnikuullutik avataaniit tikittut tamarmik tunillatsissimanermut ersiuteqarnerlutik immikkut eqqumaffiginninnissaannut noqqaaffigivai, taamatuttaarlu avataaniit tikinnerannit ullut tallimassaanni misissorteqqinnissaat piumasaralugu. Taakku saniatigut allanut qanillivallaannginnissamik, assaat errorluartarnissaannik il. il. maleruagassat immikkut eqqummaariffigilluaqquneqarput.