Corona: Naalakkersuisut tusagassiortunik aggersaapput

Peqqissutsimut Naalakkersuisoq, Anna Wangenheim aamma nakorsaaneq Henrik L. Hansen nalunaaqutaq 13.00 tusagassiortunik katersortitsissapput.

Tusagassiortunik katersortitsinermi Kalaallit Nunaannut angalanermi innersuussutit nutaat saqqummiunneqassapput.

Taama nalunaaruteqartoqarnerata nalaani Danmarkimi suli sukaterisoqarpoq:

• Aqagu nalunaaqutaq 12.00 aallartiffigalugu inuit katersuussinnaasut amerlanerpaamik 50-iusalissapput. Tamanna oktoberip 4-ata tungaanut atuutissaaq. Timersorneq, kultoorimik suliaqarneq aamma ataatsimeersuarnerit tassani pineqanngillat, issiasoqarsinnaammat. Taakkunani katersuussinnaasut amerlanerpaamik 500-ssapput, danskit ministeriunerat Mettwe Frederiksen (Soc.) oqarpoq.
• Imerniartarfiit, cafeet neriniartarfiillu tamavimmik unnukkut nalunaaqutaq 22.00 matusalissapput. Taama pisoqartalissaaq arfininngorneq nalunaaqutaq 12.00 aallarnerfigalugu.
• Neriniartarfinni qanernut assiaqutit atorneqartalissapput. Statsministeriap tusagassiortunik katersortitsinerani tamanna paasinarsivoq.
• Inuinnaat suliffeqarfiillu angerlarsimaffimmi sulinissamik kaammattuuteqarnerusariaqartut, Mette Frederiksen oqarpoq.

Coronavirusip tunillaassornerulernera pissutigalugu sukaterinerit ingerlanneqalerput. Ulluni kingullerni tunillaassorneq nunap ilarujussuanut siarualertorsimavoq.

Ulloq unnuarlu ataatsip ingerlanerani katillugit 454 tunillatsissimasut nutaat nalunaarsorsimapput, tunillatsittoqarsimasinnaaneranillu misissuinerit aamma amerlanerulersimallutik, Serum Institut ilisimatitsivoq.

Naalakkersuisut tusagassiortunik katersortitsippata Sermitsiaq.AG malinnaassaaq, saqqummiussaqarumaarlunilu.