Corona: Naalakkersuisunik peqataatitaqanngitsumik paasissutissiilluni ataatsimiisitsinissaq

Namminersorlutik Oqartussat coronamut tunngartillugu piffissami kingullermi killilersuinernut tunngaviusut, kattuffinnit partiinillu illuatungiliuttunik isornartorsiorneqaqisut pillugit paasissutissiilluni ataatsimiisitsinissamut qaaqqusipput. Naalakkersuisulli isornartorsiorneqaraluaqisut ataatsimiisitsinnermut peqataassanngillat.

Ataasinngorpat ualikkut marlunut Katuap Inersuaaraani paasissutissiilluni ataatsimiisitsisoqalerpoq, tassani immikkut toqqakkat 40-t ataatsimiigiaqquneqarput, katersuunnissamut killilersuutit pillugit piffissami kingullermi aalajangiisoqartarneranut tunngaviusut paasissutissiissutigineqassallutik.

Atorfilittat Coronamut tunngatillugu suliaqartut taakkulu allattoqarfianni sulisut kisimik peqataassapput. Naalakkersuisut peqataatinneqassanngitsut, ilisimatitsissutigineqarpoq.

Oqaluuserisassat

Oqaluuserisassat imatut isikkoqarput:

1. Tikilluaqqusineq

2. Coronamut tunngatillugu suliaqartunik taakkulu allattoqarfianik ilisarititsineq

- Aalajangiinerit sumi aalajangiiffigineqartarnersut aamma suut aalajangiinermut tunngaviunersut

3. Nunatsinni coronap tuniluunneranut akiuniarnermi periusissiaq

- Piviusut tunngavigalugit coronap tuniluunnerata siammatsaaliorneqarnera

- Kalaallit Nunaata nunanit allanit suna assigiinngissutigaa?

- Siunissami aarlerinaataasinnaasut

4. Katersuunnissamut killilersuutaagallartut, init kikkut tamarmik iserfigisinnaasaat angallatillu pillugit Namminersorlutik Oqartussat nalunaarutaannik misissuineq

5. Immikkut oqaatigiumasat

Ilisimatitsissutigineqarpoq, immikkut qaaqqusat aamma peqatigiiffiit kattuffiillu kisimik qaaqquneqartut, katersuunnissamut malittarisassat atuuttut malillugit ataatsimiinnermut peqataasinnaasut. Assersuutigalugu Kalaallit Nunaanni Sulisitsisut Kalaallit Nunaanni suliffeqarfiit tamaasa sinnerlugit qaaqquneqarsimapput.

- Peqatigiiffiit kattuffiillu Nuummeersut inunnik marluinnarnik peqataatitaqarsinnaasut ilisimatitsissutigineqarpoq, taakkulu kaammattorneqarput ataatsimiinnermi paasisat pillugit tamatuma kingorna immikkoortortaqarfimminnut ilisimatitsissuteqarnissamut.

Naalakkersuisut peqataatitaqassanngitsut

Allattoqarfimmi pisortap Niels Ulrik Vintherip Sermitsiaq.AG-mut ilisimatitsissutigaa, ataatsimiisitsinissaq piffissami sivisulaartumi pilersaarusiorneqarsimasoq, Naalakkersuisunilu ilaasortat Kim Kielsenimik siuttoqartut piffissami kingullermi isornartorsiorneqarsimaqisut peqataatinneqassanngitsut.

Naalakkersuisut peqataatinneqanngippata, politikkikkut aalajangiussat pineqartillugit apeqquteqartoqarpat, taava akissutissaqassanngilasi?

- Aap, tamanna ilumoorpoq, allattoqarfimmi pisortaq akilluni oqarpoq.

Paasissutissiilluni ataatsimiisitsinermi peqataasussat taamaalillutik naatsorsuutigissanngilaat, kommunit akimorlugit politikkikkut nuna tamakkerlugu ataatsimiinnissamut killilersuinermut sooq ilaatinneqassanngitsut pillugu paasissutissinneqarnissartik. Tassa nalunaarummi aalajangersagaq illuatungiliuttut partiivinit kamaatigineqaqisoq aamma SIK-p taarsiivigineqarnissamik piumasaqaateqarniarnerminut tunngavigisaa pillugu paasissutissinneqarnissartik naatsorsuutigissanngilaat.

Kim tunuarniarit

Kim Kielsenimmi politikkerit kattuffiillu sooq assigiinngitsumik pinerlugit nassuiaarusunnginnera naammagineqanngeqaaq. IA-mi Partii Naleqqamilu siulittaasut piumasaraat, Kim Kielsen Naalakkersuisut Siulittaasuattut tunuassasoq, KNR allappoq.

Powered by Labrador CMS