Coronamut misissuisarfimmik Qaqortumi ammaasoqassaaq

Qaqortumi coronavirusimik tunillaassuuttoqarnera pissutigalugu Qaqortumi misissuisarfimmik ammaasoqartussanngorpoq. Misissuisarfik sumiissanersoq suli aalajangerneqanngilaq.

Qaqortoq,

Tunillatsissimasut nutaat arfinillit Qaqortumi sapaatip akunnerata ataatsip ingerlanerinnaani paasineqarput.

Taakkunannga pingasut Rockhousemi Tombap tallimanngornermi 9. juli tusarnaartitsinerani peqataasimapput. Tusarnaariaqataasut 250-it maanna mattusimasussanngortinneqarput misissorneqartussanngorlutillu.

- Qaqortumi tunillaassuuttoqarnera pissutigalugu misissuisarfissamik pilersitsisoqassaaq. Taanna sumiissanersoq suli inissivinngilaq. Kisianni peqqinnissaqarfimmi sulisut misissuisassapput, peqqissutsimut Naalakkersuisoq Kiista L. Fencker sisamanngornermi tusagassiortunik katersortitsinermi ilisimatitsivoq.

Misissuisarfiit tatineqartut

Misissuinerit kingulliit tunillatsissimasoqanngitsut paasineqarput. Qaqortumili misissuisarfiit tatineqarsimapput, arlallillu suli akissutisisimanngimmata ilumut tunillatsittoqarsimannginnersoq qulakkeerneqarsinnaanngilaq.

- Misissugassat 150-it maannakkorpiaq Narsarsuarmiipput, taakkulu Nuummukaannissaat sulissutigineqarput. Qaqortumiit misissugassat nassiunneqarsimasut akissutisinissaannut ullunik marlunnik kinguaattooqqasoqarpoq. Misissuisarnerit tatineqarsimapput, Naalakkersuisut siulittaasuat Múte B. Egede tusagassiortunik katersortitsinermi oqarpoq.

Misissugassat suli akissutisineqanngitsut Narsarsuarmi uninngatinneqarallarneranut pissutaavoq silarlussimanera timmisartullu akornuteqarsimanera. Misissugassat Nuummukaanneqarnissaat maanna sulissutigineqarpoq.

Qaqortumi innuttaasut misissorneqartarnerat eqaannerulersinniarlugu illoqarfimmi misissuisarfeqalissaaq.

Misissuisarfik qaqugu ammassanersoq ilisimatitsissutigineqanngilaq.

Powered by Labrador CMS