Coronamut atatillugu sulisoqatigiit: Juullikkunni angalanaveersaaritsi
Kalaallit Nunaanni coronamut akiuiniarneq iluatsinneqassappat, nunamut virusip eqqunneqannginnissaa inuiaqatigiinnilu siaruaatinnginnissaa iluatsitsiffiusariaqarpoq. Coronamut atatillugu sulisoqatigiit erseqqissaatigeqqippaat, nunamiit nunamullu aallarnissap qanoq pingaaruteqartiginera eqqarsaatigineqassasoq. Minnerunngitsumik juullikkunni.
Nunami coronap tuniluutilersinnaaner annikillisarniarlugu angalanissat pisariaqavinngitsut pinaveersaarnissaannik Naalakkersuisut coronamullu atatillugu sulisoqatigiit inassuteqarmata, arlalippassuit nunamiit aallarnissartik taamaatiinnarluguluunniit kinguartissimavaat.
Nunamut tikittut amerlassusaasa kisitsisinngortinneqarnerisa tamanna takutippaa, coronamullu atatillugu sulisoqatigiit ilisimatitsissutigaat sapaatip akunneranut tikittartut 300-500-nik amerlassuseqartut.
Nunamut maannakkut tikittartut ilarpassui oqartussat ataanni sulisussaasarput, soorlu peqqinnissaqarfimmi sulisussat. Mianersornissarli juullikkunni malikkuminaassinnaavoq, tamannalu coronamut atatillugu sulisoqatigiinnit ernummatigineqarpoq.
- Kisitsisitigut takusinnaavarput, sapaatip akunnerani 52-imi juullisiorianik aallartussarpassuaqartoq aamma ukiortaami sapaatip akuunerata tulliani tikittussarpassuaqartoq, coronamut atatillugu sulisoqatigiinni siulittaasoq Hans-Peder Barlach Christensen Sermitsiaq.AG-mut oqaluttuarpoq.
Juullimi nuannisaaqatigiinneq tuniluutsitsilersinnaasoq
Angalanissallu taamatut ittut qularnanngitsumik pinissaat nunatsinni nakorsaanerup Henrik L. Hansenip ernummatigai.
- Danmarkimut juullisioriaraanni ilaquttat ikinngutillu peqatigalugit arlaleriarluni katersuuttoqartarpoq. Amerlasuutigut ataatsimooqatigiinnerit imigassartorfiusarput, taamalu mianersortoqarunnaartarluni, taanna oqarpoq.
Taakkuuppullu feeriareernerup kingorna ukiortaami sapaatip akunnerata aappaani nunamut maanga tikittussat ernummatigineqarnerpaasut. Nunatsinnilu nakorsaanerup aamma coronamut atatillugu sulisoqatigiit uteqqillugu kaammattuutigaat, angalanissaq ina pingaarutertiginersoq allaat kinguartinneqarsinnaanani eqqarsaatigineqassasoq.
Angalanissaq kinguartinneqarli
Inuit ilaasa Danmarkimukarluni ilaquttanut tikeraarnissamik aamma utoqqartat ilaqqutaaluunniit ilaasa napparsimaneranni najuunnissamik pisariaqartitsinerat paasinarluarpoq.
Piffissamili allami angalnissamissaq toqqarneqarsinnaavoq, taamalu nunami tamarmi ataatsimooqatigiinnissat angalasarnissallu pingitsoorlugit, coronamut atatillugu sulisoqatigiit tunngavilersuipput.
Angalanissamut piffissaq allanngortikkaanni, Air Greenlandimut akitsuummik akiliisoqartannginissaa maannakkorpiaq sulissutigineqartoq, Hans-Peder Barlach Christensenip ilisimatitsissutigaa.