Skip to main content

Coronamut atatillugu ikiorsiissutit: Naalakkersuisup naatsorsuutigaa 30 procentimik akikillisaasoqassasoq

Takornariartitsisartunut ikiorsiissutit nutaat atuutsinneqalereerput, Inuussutissarsiornermullu Naalakkersuisup naatsorsuutigaa, ikorsiissutit Kalaallit Nunaanni angalanermut 30 procentimiit 35 procentit angullugit akikillisaassutaajumaartut.

Naalakkersuisut angalanissamut ikiorsiissutit ataasinngormat atuutsilerpaat, ikiorsiissutit Kalaallit Nunaanni angalanermut akikillisaassutaassapput, taamaalilluni takornariartitsisartut sakkortuumik eqqugaasimasut ikiorserneqassallutik.

Inuussutissarsiornermut Naalakkersuisup Jens-Frederik Nielsenip (D) naatsorsuutiga, ikiorsiissutit angalaniartut bilitsissaannut 30 procentimiit 35 procentimut akikillisaataassasut.

Bilitsit Kalaallit Nunaanni angalanermi atorneqartussat pineqarput.

Jens-Frederik Nielsenip oqaluttuaraa, Naalakkersuisut ikiorsiissutinut seks miliuunit sinnilaarlugit immikkoortitsisimasut, aamma Air Greenlandimut isumaqatigiissuteqartoqareersimasoq, ingerlatseqatigiiffiup isumaqatigiissut ulluni qaninnerni saqqummiutissamaarpaa.

Angallaffiunerpaanngitsumi ikiuutaasinnaasoq

- Oqaloqatigiinneq qangali ingerlasimavoq, periarfissallu suunersut misissorsimavavut. Air Greenlandimut atatillugu bilitsit aalajangersimasumik amerlassusillit pineqarput. Ingerlatseqatigiiffimmut aningaasat killilimmik amerlassusillit pillugit isumaqatigiissuteqartoqarsimavoq, Jens-Frederik Nielsen Sermitsiaq.AG-mut oqarpoq.

Jens-Frederik Nielsenip naatsorsuutigaa Air Greenlandimut isumaqatigiissuteqarnerup saniatigut, Disko Line aamma Arctic Umiaq Line kiisalu takornariartitsisarfiit mikinerit arlallit isumaqatigiissuteqarfigineqassasut. Isumaqatigiissutilli taakku suli inaarutaasumik akuersissutigineqanngillat.

- Neriuppunga inuit periarfissamik atuiumaartut, amerlasuullu nunami takusassarsiorlutik angalajumaartut, Jens-Frederik Nielsen oqarpoq.

Aasaanerani sulinngiffiusartup naangajalernerani ikiorsiissutit qanoq ikiuutaassangatippigit?

- Neriuutigisara tassaavoq, angallaffiunerpaanngitsumi ikiuutaasinnaassasut. Tassa inuit angalanissamut akissaqarsimanngitsut maanna angalasinnaanngussasut. Aamma inuit ilaat angalanerulerumaartut. Pineqartormi tassaavoq aningaasaqarnerup ineriartortinneqarnissaa.

- Inuit ilaasa bilitsitik qularnangitsumik utertissavaat

- Inunnut angalanissamut nalinginnaasumik akissaqarneq ajortunut tamatuma periarfissiinissaa ilimagineqartariaqarpoq, Jens-Frederik Nielsen oqarpoq.

Inuit sapaatit akunnerinut aggersunut bilitsisereersimasut eqqarsaatigalugit, qulakkeerlugu oqaatigineqarsinnaanngilaq akikillisaaffigineqarsinnaanerat, naalakkersuisoq nassuiaavoq.

Matumani ingerlatseqatigiiffiit bilitsinik pisiarineqareersimasunik utertitsinissamut malittarisassaat atuutissapput.

- Inuit ilaasa bilitsitik qularnanngitsumik utertissavaat, nutaamillu pisiaqarlutik. ikiorsiissutit uku piffissami sivikitsumi suliaqartitsiniarnitsinnut takussutissaapput. Tamanna periarfissatut isigineqartariaqarpoq, Jens-Frederik Nielsen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER