Coronamut atatillugu aarlerisaarut: Aappariit mattusimasussaaneq soqutiginagu nuannataariarsimasut
Aappariit Danmarkimit tikissimasut angerlarsimaannarnissamut malittarisassat soqutiginagit inunnik 20-nik peqataasoqartumut nuannisariarsimapput. Arfininngormat tamanna pillugu politiit Nunattalu Nakorsaaneqarfia ulapissimapput.
Aappariit Danmarkimit tikinnerminnit ulluni tallimani angerlarsimaannaqqaaratik tunillatsissimanerlutillu misissorteqqeqqaaratik Qaqortumi inunnik 20-nik peqataasorlutik nuannataartunukarsimasut paasineqarmat politiit Nunattalu Nakorsaaneqarfia arfininngormat ulapissimapput.
Aappariit tigusarineqarsimapput ilaatigullu aalakoornerat pissutigalugu kikkunnik attaveqarsimanersut politiit paasiniaasussaammata unnerluutigineqarsimallutik.
- Piaartumilli misissortippavut, qujanartumillu coronamik tunillatsissimanngillat. Tamatuma malitsigisaanik tunillatsissimasinnaasunik ujaasinissarsuaq ingerlatinngilarput, aappariit tigusarineqarmata tamanna aallartinneqaraluarpoq, Nuummi politiit pigaartuisa pisortaat Søren Bendtsen ilisimatitsivoq.
Akisussaassuseqanngitsumik iliuuseqarneq
Søren Bendtsenip takorlooruminaatsippaa, aappariit Tuluit Nunaanni coronamik tuniluutipallassinnaasumik tunillatsissimasuuppata qanoq kinguneqarsimasinnaanera.
- Akisussaassuseqanngilluinnartumik iliuuseqarsimaneq pineqarpoq, pigaartut pisortaat oqarpoq, oqaatigalugulu pineqartunut taakkununnga marlunnut akiligassiissut qanoq annertutigissanersoq pillugu suliaqartoqassasoq.
- Coronamut atatillugu malittarisassat unioqqutinneqarneranni pissutsit naapertorlugit akiligassiissutissaq qanoq annertuigissanersoq nalilersorneqartarpoq, Søren Bendtsen ilisimatitsivoq.