Coronamut akiligassaq annikinneerarsuuvoq
Aningaasanut inatsisissatut siunnersuut 2022-moortoq Naalakkersuisut naammassingajalerpaat. Maannamut ilisimasat pissutissaqalersitsipput naatsorsuutigissallugu aningaasaqarnikkut ataqatiissitsiniarneq naatsorsuutigisamit ajornannginnerulaassasoq. Tassami naatsorsuutigineqaraluarpoq 2020-mi 450 millioner koruuninik amigartoortoqassasoq, maannali amigartoorutissat ”taamaallaat” 135 millioner koruuniussasut paasinarsivoq.
Aningaasanut inatsit 2020-moortoq aalajangerneqarpoq ingerlatsinermut sanaartornermullu sinneqartoorfiussasoq 49,6 millioner koruuninik. Taavali covid-19 takkuppoq sunalu tamaat mumisillugu. Taamaalilluni 2020 naammat missingersuutigineqarpoq 455,2 millioner koruuninik nunatta karsia amigartuussasoq. Taamaattorli missingersuutaagaluartunut sanilliullugu amigartoorut taamaallat 135 millioner koruuniuvoq, taamaammat aarleqqutigineqartumit angusaq pitsaanerujussuuvoq.
Aviisi Sermitsiaq taama allappoq.
Aamma ukioq manna – manna tikillugu – naatsorsuutigisamit aningaasaqarnikkut ajunngunnerusumik ingerlasoqarpoq, ukiullu sinnerani tuniluuttoqartarnera aqunneqarsinnaappat, aammalu covid-19-mik tunillatsissimasut sapinngisamik ikinnerpaatinneqarsinnaassappata, taava aamma ukioq manna aningaasaqarnikkut ingerlatsineq naatsorsuutigisamit pitsaanerusumik angusaqarfiusinnaavoq.
Taamaalilluni Kalaallit Nunarput nunarsuarmi nunani peqqissutsikkut aningaasarsiornikkullu aniguilluarnerpaat ilagisinnaavaat, illuatungaani nunarpassuit, aamma nunat assersuutiginiartakkat ilanngullugit aningaasarsiornikkut ataqatigiissaariniarsarinerminni ajornartorsiornerujussuusut.
Aningaasaqarnermut siunnersuisoqatigiit nalunaarusiaminni kingullermi (maj 2021-meersumi, aaqq.) naqissuserneqarpoq Kalaallit Nunaat ajornartoornermit peqqissutsikkut aningaasaqarnikkullu maannamut naatsorsuutigisamit aammalu nunanut allanut sanilliullugu aniguilluarnerusoq:
- 2020-ip ingerlanerani nunarsuaq tamakkerlugu aningaasaqarnikkut kinguariartoqartoq aningaasaqarnikkut kisitsisit paasissutissiissutit takutippaat nunami maani 2020-mi aningaasaqarnikkut annikitsumik siuariartoqarsimasoq. Aamma sulisoqarnikkut annikitsumik siuariartoqarsimavoq. Sanaartornerup iluani aamma inuit atuineranni siuariarneq 2020-mi aningaasaqarnikkut annikitsumik siuariarnerup qulakkeerneqarnissaanut naammattumik sakkortussuseqarsimavoq, naak takornariaqarnerup tassungalu atasut inuussutissarsiutit iluini kinguariartoqaraluartoq. Nunanit allaniit tikeraartut amerlassusaat sakkortuumik appariarsimapput, nunanillu allamiut hotellini unnuisarneri, neriniartarfinnukartarneri umiarsuillu takornariartaatit tikittarneri appasissorujussuarmiissimallutik imaluunniit soqanngiivissimalluni. Sulisartut 3 pct.-ii akunnittarfinni neriniartarfinnilu sulisimapput, taakkununnga ilanngutissapput takornariartitsinermi, timmisartukkut assartuinermi il.il. sulisut, Aningaasaqarnermut Siunnersuisoqatigiit nalunaarusiaminni naqissusiipput.
Aviisimi Sermitsiami atuarnerusinnaavutit. Aviisi uani pissarsiariuk: