Coronamik tunillatsissimasup ilaqutaa tunillatsissimanngitsoq
Aasianni coronami tunillatsissimasup ilaqutaa misissorneqarami tunillatsissimanngitsoq paasineqarpoq. Aningaasaqarnermut ataatsimiititaliami ilaasortaq mattusimajunnaartinneqarput.
Aasianni coronavirusimut tunillatsissimasup ilaqutaa siullermeertumik misissortikkami tunillatsissimanngitsoq paasineqarpoq.
Tamannali isumaqanngilaq pineqartoq Aasianni innuttaasunut akuleruteriaannanngortoq.
Ilaqutaasormi suli ulluni arfineq-marlunni angerlarsimaannarallaqquneqarpoq, nualluut timaani suli ineriartorsinnaammat. Sapaatip akunnera ataaseq missaa qaangiuppat coronavirusimut misissorteqqittussanngorpoq.
Corona pillugu suliaqartut tallimanngornermi ullup qeqqaraa tusagassiortunut paasissutissiigamik taama ilisimatitsipput.
Inatsisartut mattusimajunnaarput
Aasianni coronamik tunillatsittoqarsimanera pissutigalugu Inatsisartut ukiaanerani ataatsimiinnertik piffissalingaanngitsumik kinguartittariaqarsimavaat.
Inatsisartunit aningaasaqarnermut ataatsimiititaliap coronamik tunillatsissimasoq ataatsimeeqatigisimavaat. Mianersorniarnerlu pissutigalugu ataatsimiititaliami ilaasortat pingasunngornermi unnukkut nalunaarfigineqarpoq mattusimagallassasut.
Ataatsimiititaliami ilaasortat maanna mattusimajunnaarput, ukiakkullu ataatsimiinneq nangeqqinneqarsinnaalerluni. Inatsisartut Siulittaasuata, Vivian Motzfeldtip uppernarsarpaa ukiakkut ataatsimiinneq nangeqqinneqarsinnaalertoq, ullormilli ataatsimiiffissamik siullermik taasinani.
Nakorsaaneq Henrik L. Hansen sisamanngornermi tusagassiortunik katersortitsigami nassuiaavoq tunillatsissimasinnaasoq ulluni marlunni siullerni tunillaasinnaasanngitsoq.
Mattusimanissamut malitassat unioqqutinneqartut
Coronamik tunillatsissimasoq nutaaq Aasianni pingasunngormat ualikkut paasineqarpoq. Tunillatsissimasoq paasineqarpoq nunatsinnut tikinnerminit ullut tallimassaani misissortimmat. Angalasimasulli mattusimagallarnissamut maleruaqqusat malissimanngilai, pulaartoqartarsimallunilu.
Tamassuma kingunerisaanik Aasianni inuit qulit, tunillatsissimasumut qanillivallaarsimasut mattusimagallartussanngortinneqarput. Mianersornissaq pissutigalugu inuit taakku pineqartut suli mattusimaannarallassasut ilisimatitsissutigineqarpoq.
Sisimiuni KTI-mi sanaartornermik ilinniarfimmi ilinniartoq ataaseq ippassaq ualikkut aamma mattusimasussanngortinneqarpoq, Aasianni tunillatsissimasumut qanippallaarsimammat. Ilinniaqatai 80-t ullumi atuariartoqquneqanngillat.