Coronamik tunillatsissimasoq politiinit misissuiffigineqartoq
Inuk ataaseq ilisimasassarsiortut umiarsuaanneersoq coronavirusimik tunillatsissimasoq sapaatip akunnerani kingullermi paasineqarpoq. Politiit tamanna maanna misissuiffigaat, tunillatsissimasup mattussimasussaanermut malittarisassanik malinnissimannginnera pissutigalugu, KNR ilisimatitsivoq
Nunatsinni Nakorsaanerup Henrik L. Hansenip KNR-mut ilisimatitsissutigisimavaa, inuup coronavirusimik tunillatsissimasup mattussimasussaanernermut malittarisassat malissimanngikkai.
Tunillatsissimasoq ilisimatusartut umiarsuaanninngaanneersuuvoq, pineqartorli coronamik misissorneqarsimanerminut suli akissutisisimanani, umiarsuami inuttat allat peqatigalugit Nanortalimmi angalaarsimavoq.
Mattussimasussaanermulli malittarisassat malillugit illoqarfimmi angalaartoqaqqusaanngilaq.
Mattussimasussaanermut malittarisassat malinneqarsimanngippata, Kalaallit Nunaanni Politiit akiligassiisinnaaput, taamaammallu politiit pisimasoq misissuiffigaat:
- Paasissutissat maanna paasiniarneqartut paasitinnagit pisoq pillugu oqaaseqarsinnaanngilagut, taakkua piareeriarpata annerusumik oqaaseqarsinnaassaagut, Kalaallit Nunaanni Politiit attaveqartartuat Camilla Palmann KNR-mut ilisimatitsivoq.