Coronamik tunillatsissimasoq Nuummi paasineqartoq
Sermitsiaq.AG-p paasissutissaatai naapertorlugit, Danmarkimit tikissimaasoq misissorteqqinnermini coronamik tunillatsissimasoq paasineqarsimavoq. Tusarfiit tutsuiginartut naapertorlugit pineqartup tikinnermini mattusimasussaanermut malittarisassat malissimavai.
Nunami maani qaammaterpassuarni coronamik tunillatsittoqarsimanngeriarluni tunillatsissimasumik paasisaqartoqarsimavoq. Sermitsiaq.AG-mit tamanna paasineqarpoq.
Aaqqissuisoqarfiup paasissutissaatai naapertorlugit, tunillatsissimasup mattusimasussaanermut malittarisassat malissimavai.
Nanortalimmi juulip qaammataata naanerani, Kalaallit Nunaanni coronamik kingullermik tunillatsittoqarsimaneranik paasisaqartoqarpoq.
Tassani umiarsuarmi Kalaallit Nunaanni ilisimatusartunit atorneqartumi inuttaq tunillatsissimalluni.
Taamanikkut pisoq aalassassimaartitsivoq, paasinarsimmat umiarsuarmi inuttat ilaasullu coronamut tunngatillugu malittarisassanik malinninnatik Nanortalimmi angalaarsimasut.
Kalaallit Nunaanni manna pisoq sioqqullugu tunillatsissimasut 14-iusimapput - corona pissutigalugu uninngasoqarsimanngilaq aamma toqusoqarsimanngilaq.