Coronamik tunillatsinnikuusimasoq: Kingunerluuteqarpugut
Nuummi coronamik tunillatsinnikuusimasoq sakkortuumik kingunerluuteqarsimavoq. Maanna oqaluttuaraa napparsimanikuunini kingunerluutigisimasanilu.
Nuummi coronamik napparsimanikuusimasoq napparsimasimanini kingunerluutinilu pillugit maanna oqaluttuarpoq. Pineqartoq Nuummi upernaakkut tunillatsissimavoq.
Pineqartoq kinaassutsiminik isertuusserusuppoq, tunillatsissimanini pillugu nammineq ilaqutaalu nikassarneqaratarnissartik ernumagigamikku. Aaqqissuisoqarfimmit aalajangerpugut pineqartoq Inuk-mik taajussallugu, kinaassusaali aaqqissuisoqarfimmi ilisimavarput.
Inuk inuusuttuuvoq, timersortarpoq peqqissumillu inooriaaseqarluni. Napparsimanerminilli oqaluttuaa tusarnaaginnarluguluunniit sakkortuvoq. Napparsimanermut ersiutit siulliit pigisai tassaapput nuffasernermut ersiutaasut. Immaqa influenzamut assigunerupput, aammali sakiakkut naqinneqartutut eqqumiiginarsinnaasumik malunniuttoqarluni.
- Naluara qanoq tunillatsissimanerlunga. Immaqa suliffimmiiusinnaavoq, imaluunniit nalunngisama angalasimasup tunillassimasinnaavaanga, taannali napparsimanngilaq. Nalunngisarali alla aamma tunillatsissimasoq paasivara, Inuk Sermitsiaq.AG-mut oqaluttuarpoq.
Ersiutit
Inuk oqaluttuarpoq illoqutigiiullutik Covid-19-imik tunillatsissimanermi ersiutit arlallit napparsimanerminni misigisimallugit.
Nammineerluni eqqaavai kiaqarneq, kakkilertaneq, quersorneq, niaqorlunneq influenzamullu ersiutinut assingusinnaasut allat. Aammali ersiutit sakkortunerusut, soorlu puakkut anniarneq, alleqqukkut anniarneq alleqqumut tamarmut atasut, qasoqqarujussuarneq, susunnimut malussarinniutit pigiunnaarneri aamma naamasaataarunneq.
- Napparsimaninni atuipilunnerpaaffinni ulluni marlunni siniinnangajappunga, piffissamilu tassani tre kilomik oqilillunga allaat. Illoqutigiinni napparsimanitsinni ataavartumik attavigineqanngilagut, malitseqartitsisumilli attaveqarfigineqarpugut tunillatsissimanitta paasineraniit sapaatip akunnera ataaseq qaangiummat, oqaluttuarpoq.
Kingunerluutit arlallit
Inuk ilanilu tunillatsissillutik napparsimanermi nalaanni mattusimaqqissaarput. Naatsorsuutigaat allanik tunillataqarsimanatik.
Sermitsiaq.AG-p allaaserisaa sapaatip akunnera kingulleq saqqummersoq, tassa nakorsaaneqarfik ilisimasaqanngitsoq kingunerluuteqarsimasunik, Inuup sapaatip akunnerata siuliani atuarpaa.
Napparsimanerulli kingorna pingaartumik Inuk arlalinnik kingunerluuteqarpoq.
- Qaammatini sisamani siullerni susunninneranik maluginiuteqanngilanga aamma naamasaateqanngilanga. Illoqatigiinni ilaat puakkut anniaateqarput, niaqorlorujussuartarpugut, qasorujussuarluta aamma nukillaangalluta. Ilarput suli uummatimigut ippiginiagaqartarpoq. Uanga suallannerinnarmi sigguukka tungujorteriasaartarput, anersaartorniarnerami suli erloqinarsinnaasarmat. Piffissami sivisuumi timersorsinnaasimanngilanga, oqaluttuarpoq.
Kanngusunneq aamma kiserliorneq
Taanna oqaluttuarpoq illoqutigiiullutik nalugitsik kingunerluutit pillugit sumut saaffiginnissanerlutik. Ilaqutariinni ilaat coronamik napparsimasimaneq kanngunartutut misiginarpoq, aammali kingunerluuteqarneq kanngusugineqarluni.
- Kisimiittutut misiginartorujussuuvoq, oqarpoq.
- Iluaqutaasimasut ilagaat danskit Facebookimi gruppianni Covid-19-ip kingorna misigisimasat pillugit oqaluttuartoqartarmat. Tassani paasivara kisimiinnata, oqarpoq.
Inuup oqaluttuamini ersarissarusuppaa kalaallit coronamik napparsimasimasut aamma kingunerluuteqarsinnaammata, ulluinnarni inuunermut allaat sunniutaasinnaasumik. Inuk ilisimatitsivoq ilaqutariit allat Nuummiittut aamma nalunagit coronavirusimik tunillatsissimasut, taakkulu aamma kingunerluuteqarnermik misigisaqarsimasut.
- Nappaat kingunerluutaalu nuanninngilluinnarput.