Coronamik napparsimasoqanngilaq - misissukkat tamarmik ajunngillat
Inuit pingasut coronavirusimik tunillatsissimasutut pasitsaanneqartut tunillatsissimanngillat.
Coronamut ernummateqarneq, ippassaq Københavnimiit timmisartorsuarmut ilaallutik tikittut pingasut coronamik tunillatsissimasutut pasitsaanneqarmata annertuseriarujussuarpoq.
Maannaili laboratooriami misissukkat takutippaat coronamik tunillatsissimanngitsut, Kalaallillu Nunaanni taamaalilluni coronamik suli napparsimasoqarani.
- Tamatumannga ilisimatinneqarluni eqqissiallannarpoq. Pisoq ingasaanneqartutut misinnarsimavoq, nuannerporli takusinnaallugu pimoruunneqartoq. Tullissaanik pasitsaassisoqarpat qajoq iliuuseqartoqarnissaa nalornissutigineqarunnaarpoq, Alexandra Pipaluk Hammeken coronamik tunillatsissimasutut pasineqartut pingasuusut ilaat oqaluttuarpoq.
Alexandra Pipaluk Hammeken, ilinniartitsisunngorniartuusoq Savalimmiunilu Thorshavnimi atuarfimmi sapaatip akunnerini sisamani ilinniartitsisimasoq nunatta nakorsaaneranit ilisimatinneqarsimavoq.
Taamaalillut inuit 55-it – angerlarsimaffimminni mattussaaqqasut – eqqissiallassinnaanngorput.