Coronamik napparsimasoq kingulleq peqqissivoq

Nunatsinni coronavirusimik tunillatsissimasut 18-issaat maanna peqqissisimavoq. Taamaalilluni Kalaallit Nunaat coronavirusimik tunillatsissimasueruppoq. Juullip nalaani angalaneq pillugu tusagassiortunik katersortitsisoqassaaq ullumi nal. 13.00.

Nunatsini coronavirusimik tunillatsissimasut tamakkerlutik peqqissisimapput.

Nunatsinni nakorsaaneqarfiup nittartagaani inuit 18-it tunillatsissimasut tamarmik peqqisseqqissimasut, nalunaarutigineqarsimavoq.

Coronavirusimik tunillatsissimasoq pingasunngornermi 18. november peqqissisimasutut nalunaarutigineqartoq, corona pillugu sulisoqatigiit taama ilisimatitsipput.

Inuk pineqartoq novemberip 11-ani, angalareernerminit ullut tallimassaanni misissortinnermini, tunillatsissimalluni paasivaa. Pineqartoq Aasianniippoq.

Juullimi angalaneq ernumagineqarpoq

Corona pillugu sulisoqatigiit sapaatip akunnerata siuliani tusagassiortunik katersortitsinerminni innuttaasunut kaammattuuteqarput juullip nalaani pisariaqanngitsumik angalaqqusinatik. Juullilli nalaani angalasussat malunnaatilimmik ikileriarsimanngillat. Taamaammat corona pillugu sulisoqatigiit ullumi nalunaaqutaq 13.00 tusagassiortunik katersortitsissapput, angalanissat pillugit kaammattuuteqassallutik pitsaasunillu siunnersuuteqassallutik.

Sermitsiaq.AG-p ilisimatinneqarnera naapertorlugu ullumi nutaanik tunillatsissimasunik nassaartoqarsimanngilaq nutaanillu killilersuutiliortoqassanani.

Powered by Labrador CMS