Coronamik misissuinerit nunap immikkoortuini annertuumik nikingassutillit
Tunillatsittoqaqqissimannginera nunatta nakorsaanerata nittartagaani takuneqarsinnaavoq. Tuniluunnerup siammatsaaliornissaanik periuseq iluatsissimasutut isikkoqarpoq, sumi misissuisoqarnera eqqarsaatigalugu kommunit akornanni annertuumik nikingassuteqartoqaraluartoq
Ippassamut misissuinerit 770-it ingerlanneqarsimapput, ullumilu Sisamanngornermi Illernartumi nalunaaqutaq 13.00 misissuinerit 844-nik amerlassuseqalersimallutik. Ullumikkut oqariartuutigineqartoq nuannersoq tassaavoq Statens Serum Institutimit misissukkanut akissutit tamarmik tunillatsittoqarsimannginneranik ersersitsinerat.
Peqqinnissamut oqartussat misissuinerit aallartinnerannit amerlanerujussuarnik mmisissuisalersimannut kisitsisit nutaat aamma takussutissaapput. Nunatta nakorsaanera Henrik L. Hansen marsip 29-ani paasissutissiivoq, coronamut misissuinerit amerlanerujussuit ingerlanneqalernissaat aalajangiunneqarsimasoq, sinerissamilu amerlanerujussuarnik misissuisoqarnissaa pingaartinneqartoq.
Nikingassutit annertuut
Naatsorsukkanili Sermitsiaq.AG-mit suliarineqarsimasuni takutinneqarpoq, misissuisarnermut periusissiaq nutaaq kommuninut ataasiakkaanut malissallugu peqqussutigineqartoq eqqarsaatigalugu suliniutit annertuumik nikingassuteqartut.
Nuna tamaat eqqarsaatigalugu innuttaasut 1,5 procentii misissorneqarsimapput, kisitsisilli kommuninut naatsorsorneqarsimasut misissoraanni, procentinngorlugu kisitsit Qeqqata Kommuniani 0,44 procentimit illoqarfiit pingaarnersaata kommuniani 2,78 procentinut nikingassuteqarpoq, tamaani peqqinnissamut oqartussat innuttaasut ilaannik 642-nik misissuisimammata.
Nuup avataani amerlanerujussuarnik misissuisoqarnissaanik periusissiaq Kommune Kujallermi sunniulluarsimavoq, tamaani peqqinnissamut oqartussat misissuinissamut periusissiap nutaap marsip 29-ani suaarutigineqarneranit coronamut misissorneqartut amerlassusaannik marloriaatinngortitsisinnaasimammata taamaammallu ullumikkut Sisamanngornermi Illernartumi misissuinerit 159 procentinik qaffariaateqarsimanerannik takutitsisinnaalersimallutik.
Tamatuma akerlianik Qeqqata Kommunia immikkooruteqarpoq. Tassani piffissami qaffariaat taamaallaat 78 procentiuvoq, innuttaasullu amerlassusaannut tamarmiusunut sanilliullugu misissorneqarsimasut 0,44 procentiusut nunatsinni appasinnerpaajupput.
Taamaammat Kommuneqarfik Sermersooq qaffasinnerpaamiippoq
Illoqarfiit pingaarnersaata kommuniani misissuinerit amerlanerpaajunerat tupaallaatissaanngilaq, tamaani inuit tunillatsissimasut aqqanillit, ullumikkut peqqisseqqereersimasut, paasineqarsimammata. Politiit tamatumunnga atatillugu inunnik tunillatsissimasut eqqaanniissimasunik sumiissusersiiniarsimapput, peqqinnissamut oqartussat misissuisinnaaqqullugit amerlanerusullu tunillatsissimasinnaanerannik pasitsaassineq peerneqarsinnaaqqullugu.
Innuttaasut amerlassusaannut sanilliullugu kommunit sinnerisa akornanni misissuinerit amerlassusaasa annertuumik nikingassuteqarnerannut nassuiaatissap suunera Sermitsiaq.AG-p ullumikkut akissutissarsisinnaasimanngilaa.