Coronamik annilaanngateqarneq Nuup Bussiisa akisunaaraat
Nuuk coronamik tuniluuffiunngikkaluartoq, innuttaasorpassuit bussit ilaaffigerusunngilaat. Tamanna bussiutileqatigiiffimmut Nuup Bussii A/S-imut koruuninik milionerpassuarnik naleqarpoq, ingerlatseqatigiiffimmi pisortaq ilisimatitsivoq.
Nuup Bussiini 314.000 koruuninik sinneqartooruteqarnissamik naatsorsuuteqartoqarsimagaluartoq, maanna 6,6 millioner koruuninik amigartooruteqarnissaq nalilerneqarpoq, pisortaq Mogens Nathansen Sermitsiaq.AG-mut ilisimatitsivoq.
- Sakkortuumik eqqugaavugut. Bussiutitsinni issiaviit amerlassusaannut naapertuuttumik ilaasoqarsinnaasunngorluta oqartussat killiliiffigisimavaatigut. Taamaammat ilaasartuttat bussit angallassissutitut atorusuttanngilaat, Mogens Nathansen ilisimatitsivoq.
- Ajornerpaarli tassaavoq, innuttaasut bussinut ilaanerminni tunillatsissinnaanerminnik annilaanngateqarnerat. Aap unammilligassaqarpugut, pissutigalugu illoqarfimmi tuniluuttoqanngikkaluartoq oqartussat killersuineranni, inuit ilaasorisartakkatta ilaasaqqilersiniarnerat ajornarmat, bussiutileqatigiiffimmi pisortaq erseqqissaavoq.
Piffissat ingerlaarfiusartut allanngortinneqartut
Taassuma ilisimatitsissutigaa, corona pillugu suleqatigiinnut, Naalakkersuisunut siunnersuisartunut, piffissami tuniluuffiunngittumi bussinut killilersuutit atorunnaarsinneqarnissaat saaffiginnissutigisimallugu. Akissuteqarnissaalli arlaleriarluni nukingisaarutigisimagaluarlugu suli tusagaqarsimanngilaq.
Bussit ullumikkut qassinik issiavissaateqarnersut apeqqutaalluni 30-niik 36-t angullugit ilaasoqarsinnaapput. Namminneq aalajangiisinnaasuugunik, bussit inunnik 85-iniit 90-it angullugit ilaasorisinnaangaluarpaat, taamalu innuttaasut bussit ilaaffiginiakkatik ulikkaarsimammata, bussit tulliinut utaqqisariaqartarnerat atorunnaarsillugu.
Piffissat ingerlaarfiusartut allanngortinneqarsimapput, taamaalilluni bussit ingerlaartarnerat - matoqqatitsinermi - nalinginnaasumit 38 procentimik annikinnerulersimavoq. Ullumikkut atuarfiit meeqqeriviillu ammaqqinneqareernerisigut bussit tamakkiisumik ingerlaqqilersimapput.
- Komunimummi pisussaaffeqarpugut. Aamma kommunimit pigineqaratta ikiorsiissutinik pissarsisinnaanngilagut. Sulisuttaluunniit atorfissaqartissimanngisatta aningaasarsiassatut annaasaannut taartisiassaqartitsinngilagut. Soorlumi pullatip iluani mattussaaqqalluni, Mogens Nathansen, ingerlatseqatigiiffiup 20 millioner koruuninik nammineq aningaasaateqarnermigut suli akiliisinnaassuseqarneranik nuannaarutiginnittoq oqaluttuarpoq.
Akiliisinnaassuseq ajutooriaannaasoq
Akiliisinnaassuseqarneq ajutooriaannaviuvoq, aqangulu tallimanngornermi, akiliisinnaassuseqarneq oqaluuseriniarlugu, Kommuneqarfik Sermersuumik ataatsimeeqateqarniarpoq.
Apeqqutaasormi tassaavoq, kommuni ikiorsiullugu imaluunniit aningaaservimmut annertuunik taarsigassarsinikkut, bussiutileqatigiiffiup aningaasarsiassanut ulluinnarnilu ingerlatsinermut aningaasaateqarnissaata qulakkeerneqarnissaa.
- Ukioq manna bussinut nutaanut pingasunut aningaasaliissuteqarsimavugut, pilersaarutaavorlu aappaagu bussinik pingasunik aamma pisiaqaqqinnissarput. Pilersaarulli taanna allanngortinneqassanersoq naluara. Siulersuisut tassaapput tamatumunnga tunngatillugu inaarutaasumik aalajangiisussat, pisortaq oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...