Corona: Kalaallit Nunaanni pisussarpassuit unitsinneqartut
Isikkamik arsaannerit, piviusulersaarusiap takuteqqaarneqarnissaa, isiginnaartitsinerillu unitsiinnarneqanngikkunik kinguartinneqarput. Uani takukkit.
Annonce
Kalaallit Nunaanni coronavirusimik tunillatsissimasutut nalunaarsortoqarsimanngilaq.
Coronavirusimilli tunillaassuuttoqalernissaa aarleqqutigineqarpoq, taamaatullu aaqqissuussanut arlalinnut tamanna kinguneqarpoq.
Nappaatit tuniluuttut pillugit ataatsimiititaliarsuup aaqqissuussat inunnit 100-nit amerlanerusunit peqataaffigineqartut unitsiinnarneqarnissaat innersuussutigaa.
Sisorarlutik snowboarderlutillu pissartanngorniunnerit unitsinneqartut, kingullermik nalunaarutigineqarpoq.
Kinguneri immikkut taaneqartut aajuku:
Isikkamik arsaanneq:
- Kalaallit Nunaannit Timersoqatigiit Kattuffiata kaammattuutigaa timersornerit suulluunniit atorunnaarallartinneqassasut. Atorunnaarallartitsineq martsip qaammataata naanissaata tungaanut killilerneqarallarpoq.
- KAK-p angutit isikkamik arsaallutik futsalimik pissartanngorniunneri taamaatippai. Aamma nukappiaqqat U15-it U18-illu, arnat kiisalu oldboys +35 aamma +45 pissartanngorniunnissai taamaatinneqarput.
- Niviarsiaqqat U18 futsalimi pissartanngorniussapput, isiginnaartoqaratilli.
Assammik arsarneq
- Kalaallit Nunaanni Assammik Arsartartut Kattuffiata aalajangerpaa ynglinget Sisimiuni aprilip aallartilaarnerani pissartanngorniunnissaraluat atorunnaarsinneqassasoq. Pissartanngorniunneq ukiarumut nuutsinniarneqarpoq.
- Juniorit pissartanngorniunnissaat, Nuummi aprilip qiteqqunnerani ingerlanneqartussaasoq, taamatuttaaq atorunnaarsinneqarpoq, ukiamullu nuunniarneqarluni.
- Seniorit Ilulissani maajip aallartinnerani pissartanngorniunnissaat maannamut pilersaarutit malillugit ingerlanneqartussaatinneqarpoq, kattuffiulli atorunnaarsitseriataarnissani piareersimaffigaa, Kalaallit Nunaanni Timersoqatigiit Kattuffiata atorunnaarsitsinissamik kaammattuinera sivitsorneqassappat.
Kultoori
- Avalak aaqqissuussanik tamanik unitsitsivoq
- Piviusulersaarusiaq ”Kampen om Grønland” Katuami takuteqqaarneqartussaagaluartoq taamaatiinnarneqarpoq. Piviusulersaarusiaq CPH:DOX-imi ammaanersiornermi takutinneqassaaq, isiginnaagassianillu takutitsineq nittartakkakkut ingerlanneqassalluni.
- Angutibik Nunatta Isiginnaartitsisarfiani takutinneqartussaajunnaarpoq, Arctic Winter Gamesimilu isiginnaartitsisartut takutitassaraluat aamma takutinneqartussaajunnaarluni.
- Arctic Sounds Sisimiuni ingerlanneqartussaq, ullut tallimat ingerlanneqarani ulluni marluinnarni ingerlanneqassaaq. Nunanit allanit tikittussat nunani tuniluuttuniissimappata tikeqquneqarunnaarput.
Timersuutit allat
- Nuummi timersortarfiit naluttarfillu Malik piffissami aalajangigaanngitsumi matuneqarallarput.
- Sisorarnermi pissartanngorniunnerit Aasianni ingerlanneqartussat taamaatinneqarput. Alpin, langrend, snowboard aamma freestyle pineqarput.
- Sulorarnermi GM-ernissaraluaq aamma piffissaligaanngitsumik taamaatinneqarallarpoq. Pissartanngorniunnerit Paamiuni poorskikkunni pisussaagaluarpoq.
- Nuummi Sisorarfiit cafeat matuneqarpoq. Sisorarfiit atornissaannut kortimik suli pisisoqarsinnaavoq, pisinialli marlukkaartariaqarput. Sinneri silami utaqqeqquneqarput, imminnullu miiterisut ungasitsiginissaat kaammattuutigineqarluni.
- Arctic Winter Games 2020, Whitehorsemi Canadami martsip 15-aniit ingerlanneqartussaq siullersaalluni taamaatitsivoq. Peqataasussat 2.000-it missaat kajumissutsiminnillu suliaqartorpassuit Canadaliarlutik aallanngitsoorput.
- Arctic Circle Race, Sisimiuni aprilip aallartinnerani ingerlanneqartussat aamma unitsitsivoq. Timersortartut nunanit allaneersut unammineq ornigarluartaraluarpaat.
- Avannaata Qimussersuaaraa Uummannami ingerlanneqartussaq taamaatinneqarpoq.
- Avannaata Qimussersua ingerlanneqaannassaaq. Illup iluanili pisussat unitsinneqarlutik.
- Arctic Sports Greenland 20. april Nunatsinni Unammersuarnissartik novemberimut kinguartippaat.
Ataatsimiinnerit
- Nunanut allanut ministeriaqarfiup inassinerit sukaterneqareernerisa kingorna aalajangerpaa qinikkat 27.-29. marts 2020 Ilulissani ataatsimiitinneqarnissaat kinguartinneqassasoq. Nunanut allanut tunngasunut naalakkersuisoqarfiup aalajangerneq taperserpaa.
- SIK-p ilanngullugu aalajangerpaa sulisut sinniisaasa pikkorissarneqarnissaat kinguartinneqassasoq.
Katuaq
- Innersuussutit kingulliit malillugit aaqqissuussani inuit 100-t amerlanerpaamik peqataasassasut aalajangernwqarpoq. Tamannalu malinniarlugu Katuaq aaqqiissutissanik maanna suliaqarpoq.
- Filmeriat amerlanerpaamik 100-sassapput.
- Ataatsimiinnerit arlallit Katuami pisussat unitsiinnarneqanngikkuni kinguartinneqarput.
- Katuami cafemi nerriviit imminnut ungasillineqarput, sapaatip akunneratalu naanerani buffet atorunnaarsinneqarluni nerisassat piareeqqasut agguaanneqartalissapput.
- Filminik takutitseqqaarnissat arlallit kinguartinneqarput, nunani allani takutinneqarsimannginnerat pissutigalugu. Katuami CEO, Arnakkuluk Jo Kleist ilisimatitsivoq biograferiartussaagaluit akiliutiminnik utertitsiartorsinnaasut.