Corona: Avannaata Qimussersuaaraa taamaatinnarneqarpoq
Meeqqat unammissutigisartagaat, tassa avannaata qimussersuaaraa Uummannami martsip 24-ani pisussaagaluartoq, coronavirusip aarleqqutigineqarnera pissutigalugu, taamaatiinnarneqarpoq.
Meeqqat qimmii, Avannaata Qimussersua ingerlanneqarpat isiginnaaginnartariaqassapput.
Kalaallit Nunaanni Qimussertartut Kattuffiat, KNQK, aalajangerpoq Avanaata Qimussersuaaraa ukioq manna taamaatiinnarneqartariaqartoq.
Unammersuarnissaq Uummannami martsip 24-ani pisussaagaluarpoq, meeqqallu aqqaneq-marluk missaat peqataasussaagaluarlutik.
- Meeqqat coronavirusimik tunillatsinnissaat aarleqqutigileratsigu taamaatitsiinnarpugut. Illoqarfiit peqataatitaqartussat avinngarusimasuupput, tunillatsittoqarnissaalu pinngitsoortsinniartariaqarparput, KNQK-p siulittaasua Johan Olsen Sermitsiaq.AG-mut oqaluttuarpoq.
Katillugit sumiiffiit arfineq-marluk, tassa avannarpasinnerpaami Upernavik Kujalleq, kujasinnerpaamilu Sisimiut peqataatitaqartussaagaluarput.
Johan Olsen nassuiaavoq tunngavilersuutinut ilaasoq qimussersuaqartoqarnerani nunanit allanit takornariat aamma tikerartarmata.
Avannaata Qimussersua inersimasunit ingerlanneqartussaasoq ilumut ingerlanneqaannassanersoq pillugu siulersuisuunerit suli aalajanginngillat. Kingusinnerpaamik aqagu aalajangertoqassaaq.
- Pisunut malinnaavugut, oqartussallu iliuusissatut innersuutaannut malinnaalluta, Johan Olsen oqarpoq.