Corona: Arctic Sportsimi unammersuaarneq kinguartinneqarpoq
Nunatsinni unammersuarnissaraluaq kinguartinneqassasoq Arctic Sports Greenlandimi siulersuisut aalajangerpaat
Ilulissani Arctic Sportsimi unammersuarnissaq apriilip 20-ani ingerlanneqartussaagaluarpoq. Coronavirusertoqarnera pissutaalluni unammersuarnissaraluaq kinguartinneqarpoq.
Arctic Sports Greenlandimi siulittaasoq Bolethe Stenskov Sermitsiaq.AG-mut ilisimatitsivoq.
- Unammersuaarnermi tuniluuttoqassagaluarpat kingunerluttoqarsinnaavoq. Unammersuaarnermi inuit 100-t 200-llu akornanni peqataasarput, taakku nereqatigiillutillu ineqatigiittarput, unammersuaarnermi isiginnaariartoqarluartarluni. Unammersuaarnerup kinguartinneqarnissaa ippassaq aalajangerparput, oqarpoq.
Unammersuaarneq novembarip 16-anut kinguartinneqartoq ilisimatitsissutaavoq.
- Unammersuaarnermi aputeqarnissaa pisariaqarpoq, silami ilaatigut unammisitsisoqartoqartarnera pissutaalluni. Neriuutigaarput taamanikkussamut pissutsit pitsaanerulersimassasut, Bolethe Stenskov oqarpoq.